عيسی ﵇ آسمان ته پورته کېږي

څه موده وروسته چې نږدې اصحاب عيسی ﵇ ته راټول وو، له ده ﵇ څخه يې پوښتنه وکړه: ای مولا! آيا تاسې به اوس د بني اسراييلو ويجاړه شوې پاچاهي بېرته جوړه کړئ؟

عيسی ﵇ وفرمايل: د دغو کارونو وختونه او زمانې د پروردګار په اختيار کې دي. په دغو شيانو پوهېدل ستاسې کار نه دی، خو کله چې د ﷲ ﷻ سپېڅلی روح درباندې نازل شو، تاسې به قوت تر لاسه کړئ او په هر ځای کې به زما شاهدان شئ. يعنې، لومړی به په يروشلم، بيا د يهوديې او سامريې ولايتونو په ګوټ – ګوټ کې، حتی د نړۍ تر لرې – لرې ځايونو پورې به خلکو ته زما په اړه هر هغه څه وواياست چې په خپلو سترګو مو ليدلي دي.

بيا عيسی ﵇ نږدې اصحاب دباندې روان کړل او بيت عنيا ته يې راوستل. هلته يې خپل لاسونه پورته کړل او دوی ته يې دعا وکړه. بيا يې ورته فرمايل: د ځمکې او آسمان ټول اختيارات ما ته راکړل شوي دي. ځکه نو تاسې ولاړ شئ او د ټولو قومونو له خلکو څخه زما پيروان جوړ کړئ او د پروردګار، د خاص نازولي او د سپېڅلي روح په نامه سپېڅلې غوټه ورکړئ. دوی ته تعليم ورکړئ، چې ټول هغه احکام پر ځای کړي، چې تاسې ته مې درکړي دي. په ياد ولرئ، چې زه به د نړۍ تر پايه هر وخت له تاسې سره يم!

کله چې عيسی ﵇ دغه خبرې خلاصې کړې، په داسې حال کې چې اصحابو ورته کتل، ﷲ ﷻ آسمان ته پورته کړ. يوه ورېځ راغله او له سترګو څخه يې پناه کړ. دوی چې لا آسمان ته د هغه ﵇ د تګ ننداره کوله، ناڅاپه دوه کسان راښکاره شول، چې سپينې جامې يې پر تن وې. دغو دوو کسانو وفرمايل: ای د ګليل خلکو! ولې دلته ولاړ ياست او آسمان ته ګورئ؟ دغه عيسی ﵇ چې ستاسې له منځه آسمان ته پورته کړل شو، څنګه چې پورته شو، په هماغه ډول به بېرته دې نړۍ ته تشريف راوړي.