عيسی ﵇ د عماوس پر لاره دوو پيروانو ته ځان ورښيي
په هماغه ورځ د پيروانو له ډلې څخه دوه کسان د عماوس نومي کلي ته روان وو، چې د يروشلم له ښاره تقريباً اووه ميله لرې و. دوی په لارې باندې د ټولو تازه پېښو په هکله خبرې کولې. په دغو خبرو باندې اخته وو، چې عيسی ﵇ پخپله ورته راغی او د لارې ملګری يې شو، خو دوی دی ﵇ نه شو پېژندلای، ځکه چې پر سترګو يې پرده اچول شوې وه. عيسی ﵇ ترې وپوښتل: ستاسې د خبرو اترو موضوع څه ده؟
دوی دواړه ځای پر ځای ودرېدل او په څېرو کې يې له ورايه د غم نښې ښکارېدې. له دوی دوو څخه يو يې، چې کليوپاس نومېد، عيسی ﵇ ته وويل: زما په خيال، ته به په يروشلم کې يوازېنی مسافر يې، چې د دې څو ورځو له پېښو څخه نه يې خبر.
ده ﵇ وفرمايل: نو راته وواياست، چې څه پېښ شوي دي؟
دواړو ورته وويل: موږ هغه پېښې يادوو، چې پر عيسی ناصرتي راغلې. هغه ﵇ د خدای ﷻ او خلکو په وړاندې په اعمالو او خبرو کې يو قدرتمند نبي و. په دې ورځو کې زموږ لويو امامانو او مشرانو هغه ﵇ رومي حاکم ته په لاس ورکړ، تر څو د مرګ حکم ورباندې وشي او بيا يې په صليب اعدام کړ. موږ اميد درلود، چې هغه به بني اسراييلو ته خلاصون ورکوونکی وي. نن يې درېيمه ورځ ده چې دا پېښې تر سره شوې. پر دې سربېره، يوه بله خبره هم شته، چې موږ يې حيران کړي يو. نن سهار وختي زموږ له ډلې څخه يو څو ښځې قبر ته ورغلې وې، مګر هلته يې د عيسی ﵇ مبارک جسد پيدا نه کړ. دوی بېرته راغلې او موږ ته يې وويل، چې هلته مو دوې ملايکې وليدلې چې راته ويې ويل: «هغه ﵇ راژوندی شوی دی!» نو زموږ يو څو نور کسان قبر ته ورغلل او لکه څنګه چې ښځو خبر راوړی و، هماغسې حالت يې وليد. د عيسی ﵇ مبارک جسد په قبر کې نه و!
عيسی ﵇ دوی ته وفرمايل: تاسې څومره ساده او تمبل ياست. ولې تر اوسه پورې د پيغمبرانو پر خبرو باندې باور نه کوئ؟ آيا د ﷲ ﷻ وعده کړل شوي خاص استازي المسيح ته په کار نه وه، چې تکليفونه وګالي او له هغې وروسته د خپل شان او شوکت مقام ته ورسېږي؟
بيا يې دوی ته ټولې هغې وړاندوينې تشريح کړې، چې په تورات شريف او د نورو پيغمبرانو په ټولو ليکنو کې د ده ﵇ په اړه راغلې وې.
په پای کې دوی درې واړه د عماوس کلي ته نږدې شول. عيسی ﵇ خپل تګ ته دوام ورکاوه، مګر دغو دوو نورو ټينګار ورته وکړ، چې ګوره، ماښام نږدې شوی او لمر په لوېدو دی. راځه دلته له موږ سره پاتې شه.
عيسی ﵇ هم له دوی سره پاتې شو. لږ وروسته دی ﵇ له دوی سره ډوډۍ ته کېناست. يوه ډوډۍ يې راواخيسته، شکر يې وکړ، بيا يې څو ټوټې کړله او دغه ټوټې يې دواړو ته ورکړې. له همدې سره د دوی له سترګو پرده لرې شوه او عيسی ﵇ يې وپېژاند، مګر په هماغه شېبه عيسی ﵇ د دوی له سترګو څخه غيب شو. دوی له يو بل سره وويل: کله چې عيسی ﵇ پر لارې موږ ته له کلام ﷲ څخه پوهه راکوله، نو د هغه ﵇ خبرې زموږ په زړونو څومره اغېز کاوه!
دوی دواړه په هماغه شېبه راپاڅېدل او بېرته يروشلم ته ولاړل. هلته يې يوولس نږدې اصحاب او نور خلک وليدل، چې يو ځای راغونډ شوي وو. ټولو همدا خبرې کولې، چې په رښتيا سره مولا عيسی ﵇ راژوندی شوی دی او صفوان ته يې ځان ورښودلی دی! بيا دوی دواړو هم نورو ته د خپلې لارې کيسه وکړه، چې کله عيسی ﵇ ډوډۍ ټوټه کړه، نو موږ وپېژاند!
دوی لا په دغو خبرو اخته وو، چې عيسی ﵇ يې په منځ کې راښکاره شو او ويې فرمايل: سلامتيا دې وي پر تاسې!
ټول ووېرېدل او ګمان يې وکړ چې دا يوه اروا ده. عيسی ﵇ ورته وفرمايل: تاسې ولې وېرېدلي ياست؟ او په زړونو کې مو ولې شک پيدا شوی دی؟ وګورئ، دا مې لاسونه دي او دا مې پښې دي. زه پخپله يم. راشئ ما لمس کړئ. وګورئ! اروا هډوکي او غوښه نه لري، لکه زه چې يې لرم.
د دې خبرې تر ويلو وروسته، عيسی ﵇ دوی ته خپل لاسونه او پښې ورښکاره کړې، مګر له ډېرې خوشحالۍ څخه د دوی باور نه راته، چې دا کس دې په رښتيا عيسی ﵇ وي. حيرانۍ اخيستي وو. عيسی ﵇ له دوی څخه پوښتنه وکړه: د خوراک لپاره کوم څه شته؟
دوی د ماهي د غوښې يوه پخه شوې ټوټه ورکړه. ده ﵇ واخيسته او د دوی په وړاندې يې وخوړله. بيا يې ورته وفرمايل: زما تر مرګ مخکې چې زه له تاسې سره وم، ما خو همدغه خبره درته کړې وه، چې هر هغه څه چې په تورات شريف، زبور شريف او د نورو پيغمبرانو په ليکنو کې زما په اړه راغلي دي، په کار وو چې ټول يې پوره شي.
بيا يې د دوی ماغزه د کلام ﷲ په معنی ښه ورخلاص کړل. ورته ويې فرمايل: همدارنګه ليکل شوي دي، چې د ﷲ ﷻ وعده کړل شوی خاص استازی المسيح به سخت تکليفونه او خوارۍ پر ځان تېرې کړي او په درېيمه ورځ به له مرګه بېرته راژوندی شي او بيا به د هغه په نامه د يروشلم له ښار څخه نيولې د نړۍ تر ټولو قومونو پورې دغه پيغام ورسېږي، چې خلک بايد توبه وباسي، تر څو ګناهونه يې وبخښل شي. تاسې د دې ټولو خبرو شاهدان ياست. نو غوږ شئ! د څه شي، چې زما پروردګار له تاسې سره وعده کړې ده، هغه به زه درباندې رانازل کړم. تر څو چې د ﷲ ﷻ له طرفه دا قدرت درباندې نه وي نازل شوی، په دې ښار کې پاتې شئ. تاسې ته يحيی ﵇ په اوبو سره سپېڅلې غوټه درکړه، مګر يو څو ورځې وروسته به ﷲ ﷻ ستاسې زړونه په خپل سپېڅلي روح سره درپرېمينځي.