لوی امامان او افريسيان د عيسی ﵇ پر قبر مهر لګوي

په سبا، يعنې د عبادت په ورځ، لوی امامان او افريسيان يو ځای والي پيلاطوس ته ورغلل او ويې ويل: ښاغليه! موږ ته يوه خبره راپه ياد شوې ده. هغه دوکه باز له مرګ څخه مخکې ويلي وو، چې زه به په درېيمه ورځ بېرته راژوندی شم. نو موږ له تاسې څخه هيله کوو، چې تر درېيمې ورځې پورې د هغه د قبر ټينګه ساتنه وکړئ. داسې نه چې پيروان يې مړی له قبره وباسي او خلکو ته ووايي، چې له مرګه بېرته راژوندی شوی دی! که داسې وشي، نو دغه دوکه به تر لومړۍ دوکې هم ډېره بده وي.

پيلاطوس ورته وويل: تاسې ته يوه ډله ساتونکي په اختيار کې درکوم. قبر ته يې بوزئ او په خپل مهارت سره له قبر څخه ټينګه ساتنه وکړئ.

دوی هم ولاړل. د قبر پر ډبره يې مهر ولګاوه او ساتونکي يې په پېره ودرول.