د عيسی ﵇ د مبارک جسد د ښخېدو مراسم
په يروشلم کې يو سړی اوسېد، چې نوم يې يوسف و او د يهوديې ولايت د رامت له ښار څخه و. ډېر نېک او صالح سړی و او په دې انتظار کې و، چې ﷲ ﷻ خپل سلطنت قايم کړي. دی د بني اسراييلو د سترې جرګې غړی و، خو د عيسی ﵇ په اړه د نورو جرګه والو له کړې پرېکړې او عمل سره موافق نه و. يوسف پيلاطوس ته ورغی او د عيسی ﵇ مبارک جسد يې ځينې وغوښت. نو د عيسی ﵇ مبارک جسد يې له صليبه راکښته کړ. په دې کار کې نيکوديماس ورسره ملګری و، هغه ديني مشر چې مخکې د شپې لخوا عيسی ﵇ ته ورغلی و. نيکوديماس تقريباً دېرش کيلو خوشبويي له ځان سره راوړه، چې د عيسی ﵇ مبارک جسد د ښخېدو لپاره تيار کړي. دوی د بني اسراييلو د رواج له مخې د عيسی ﵇ مبارک جسد له دغو خوشبوييو سره په يوه کفن کې واچاوه. د اعدامېدو ځای يوه باغ ته نږدې و. باغ ته ورڅېرمه په غره کې د غار په شکل يو نوی قبر کيندل شوی و. څنګه چې هغه ورځ د پنا د اختر د تيارۍ ورځ وه او هغه قبر ډېر نږدې و، نو د عيسی ﵇ مبارک جسد يې پکې کېښود.
هغه ښځې چې له ګليل څخه له عيسی ﵇ سره راغلې وې، په يوسف پسې ولاړې او ويې ليدل، چې د عيسی ﵇ مبارک جسد څه ډول په قبر کې کېښودل شو. بيا ښځې بېرته ولاړې او د عيسی ﵇ د مبارک جسد لپاره يې خوشبويي او عطرونه آماده کړل. دغه وخت د عبادت ورځ (شنبه) رارسېدلې وه او دوی د شريعت له حکم سره سم له کار کولو څخه لاس واخيست.