عيسی ﵇ پر صليب شهيدېږي

غرمه مهال پر ټوله ځمکه توره تياره خپره شوه او تر درېيو بجو پورې يې دوام وکړ. لمر تک تور شو او په بيت المقدس کې سپېڅلې پرده * په منځ کې څيرې شوه. دغه وخت عيسی ﵇ په لوړ آواز ناره وکړه او ويې فرمايل: ای پروردګاره، زه مې خپل روح تا ته سپارم.

له دې خبرې سره سم عيسی ﵇ خپله ساه ورکړه.

رومي منصبدار چې دا پېښه وليده، نو د خدای ﷻ لويي يې بيان کړه او ويې ويل: بې شکه چې دغه سړی پاک او صالح و!

کوم خلک چې د عيسی ﵇ د اعدام نندارې ته راټول شوي وو، کله چې يې دا پېښې وليدلې، نو په داسې حال کې چې د غم له شدته يې خپلې سينې وهلې، خپلو کورونو ته ستانه شول، خو د عيسی ﵇ ملګري له صليبه لږ لرې ولاړ وو او دغه ټولې پېښې يې ليدلې. په دغو خلکو کې يو څو ښځې هم وې چې له ګليل څخه يروشلم ته له عيسی ﵇ سره راغلې وې.

* په بيت المقدس کې يوه پرده وه، چې هلته به په کال کې يو وار يوازې لوی امام د خلکو د ګناهونو د کفارې لپاره ترې تېرېده او د ﷲ ﷻ حضور ته به حاضرېده. د دې پردې په منځ کې د پرې کېدلو معنی دا ده چې اوس د عیسی ﵇ د قرباني کېدو په وسيله خلک له ﷲ ﷻ سره پرته له کومې موانع په اړيکه کې کېږي او له ﷲ ﷻ سره د وصل ټولې لارې د خلکو په مخ خلاصې دي.