پيلاطوس د عيسی ﵇ د اعدام امر صادروي
له دې وروسته پيلاطوس عيسی ﵇ عسکرو ته په لاس ورکړ، چې بو يې زي او پر صليب يې اعدام کړي.
عسکرو عيسی ﵇ روان کړ. ده ﵇ د صليب لرګی پر اوږو کړ او د اعدامېدو ځای ته ولاړ. دا ځای د ککرۍ په نامه مشهور و، چې په عبري ژبه يې گُلگُتا باله. هلته عسکرو عيسی ﵇ پر صليب مېخ او راځوړند کړ. د ده ﵇ تر څنګ يې دوه نور کسان هم پر يوه – يوه صليب راوځړول، يو د عيسی ﵇ په ښۍ خوا کې او بل يې په کيڼه خوا کې. پيلاطوس مخکې امر کړی و، چې د عيسی ﵇ د صليب پر سر دې يوه تخته ولګول شي او پرې ودې ليکل شي: «عيسی ناصرتي، د بني اسراييلو سلطان.» ډېرو بني اسراييلو دغه توري ولوستل، ځکه د اعدام دغه ځای يروشلم ته نږدې و او د تختې خط په عبري، لاتيني او يوناني ژبو ليکل شوی و، خو د بني اسراييلو لويو امامانو پر پيلاطوس نيوکه وکړه، چې دغه توري «د بني اسراييلو سلطان» غلط دي. د هغه پر ځای بايد وليکئ: «ده دعوه کړې وه، چې زه د بني اسراييلو سلطان يم.»
خو پيلاطوس په ځواب کې وويل: نه! زه يو توری هم نه تغييروم. څه چې مې ليکلي دي، ليکلي مې دي!
عسکرو چې عيسی ﵇ پر صليب راوځړاوه، د ده ﵇ کالي يې په خپل منځ کې په څلورو برخو سره ووېشل، خو د عيسی ﵇ کميس له يوه ټوکره جوړ شوی و. نو عسکرو له يو بل سره وويل: موږ به کميس نه څيرې کوو، بلکې پچه به پرې واچوو. (له دې خبرې سره د زبور شريف هغه وړاندوينه رښتيا شوه، چې وايي: «په خپلو کې يې زما جامې سره ووېشلې او زما پر لباس يې پچه واچوله.» دا هماغه کار و، چې عسکرو وکړ.
خلک چې د ده ﵇ خوا ته پر لاره تېرېدل، نو بد او رد يې ورته ويل او په توهين سره يې خپل سرونه ورته ښورول. ويل يې: تا خو ويلي وو، چې زه د ﷲ ﷻ کور ړنګوم او بيا يې په درېيو ورځو کې بېرته جوړوم. اوس دې خپل ځان وژغوره! که ته په رښتيا د خدای خاص نازولی يې، نو له صليب څخه راښکته شه!
لويو امامانو، ديني عالمانو او قومي مشرانو هم په دې ډول ملنډو لاس پورې کړ او ويل يې: نورو ته يې نجات ورکړ، خو ځان ته نجات نه شي ورکولای. که د بني اسراييلو سلطان وي، نو له صليب څخه دې راښکته شي او موږ به پرې ايمان راوړو! دی په خدای باور لري، نو که خدای ورڅخه راضي وي، ودې يې ژغوري! ده خو ويلي وو، چې زه د خدای خاص نازولی يم.
صليب ته نږدې د عيسی ﵇ محترمه مور، خاله يې مريم، چې د کليوپاس ښځه وه، او مريم مجدليه ولاړې وې. عيسی ﵇ له صليبه خپله مور وليدله. د هغې په څنګ کې يوحَنا ولاړ و، چې پر عيسی ﵇ ډېر ګران و. نو يې خپلې مور ته وفرمايل: مورې! سر له ننه زما دا صحابي خپل زوی وګڼه.
بيا يې يوحَنا ته وفرمايل: زما مور خپله مور وګڼه.
له هغې ورځې وروسته يوحَنا د عيسی ﵇ مور ته د خپلې مور درجه ورکړه او په خپل کور کې يې د هغې پالنه کوله.