خلک د پيلاطوس په مخکې د عيسی ﵇ د اعدام غوښتنه کوي
پيلاطوس خپلو عسکرو ته امر وکړ چې عيسی بوزئ او په متروکه يې ووهئ!
عسکرو هم عيسی ﵇ د وهلو لپاره روان کړ. له اغزنو بوټو څخه يې يو تاج جوړ کړ او ده ﵇ ته يې ورپه سر کړ. بيا يې يوه شاهي جيګري چپنه ورواغوستله. د ملنډو په ډول يې ورته وويل: سلام، د بني اسراييلو سلطانه! بيا يې پر مبارک مخ څپېړې ورکړې.
پيلاطوس يو ځل بيا د بني اسراييلو مشرانو ته راووت او ويې ويل: زه به عيسی تاسې ته راولم، خو په ياد ولرئ چې په هغه کې مې هېڅ جرم نه دی پيدا کړی.
عيسی ﵇ دباندې راوستل شو. پر سر يې د اغزنو بوټو تاج او په تن يې شاهي جيګري چپنه وه. پيلاطوس خلکو ته وويل: دا دی هغه سړی.
د بني اسراييلو لويو امامانو او کسانو يې چې عيسی ﵇ وليد، نارې يې کړې: پر صليب يې راوځړوئ! پر صليب يې راوځړوی!
پيلاطوس ورته وويل: ښه نو، پخپله يې پر صليب راوځړوئ! ما خو کوم جرم پکې پيدا نه کړ.
بني اسراييلي مشرانو وويل: زموږ د شريعت له نظره دغه سړی بايد اعدام شي، ځکه ادعا يې کړې ده، چې زه د خدای ﷻ خاص نازولی يم.
پيلاطوس چې دا خبره واورېده، لا په وېره کې شو. عيسی ﵇ يې بېرته دننه بوت او پوښتنه يې ځينې وکړه: آخر ته د کوم ځای يې؟
خو عيسی ﵇ ځواب ورنه کړ.
پيلاطوس وويل: ته ولې چپ يې؟ آيا تا ته نه ده معلومه چې زه د دې اختيار لرم، چې خوشې دې کړم او يا دې پر صليب اعدام کړم؟
عيسی ﵇ وفرمايل: که تاسې ته ﷲ ﷻ اختيار نه وای درکړی، نو هېڅ اختيار به مو نه درلود. په دې خاطر، له تاسې څخه لوی ګناهکار هغه دی، چې زه يې په لاس درکړی يم.
پيلاطوس بيا هم کوښښ وکړ، چې بني اسراييلي مشران قانع کړي، چې د عيسی ﵇ آزادي وغواړي، خو دوی چيغې وهلې: که دغه سړی مو خوشې کړ، نو د روم د امپراتور ملګری نه ياست! ځکه څوک چې خپل ځان سلطان وبولي، معنی دا چې، د روم د امپراتور پر خلاف يې بغاوت کړی دی.
پيلاطوس چې د دوی دا خبره واورېدله، عيسی ﵇ يې بيا دباندې راوايست، تر څو د خلکو په وړاندې پرې حکم صادر کړي. د حکم پر څوکۍ کېناست. دغه څوکۍ پر يوې ډبرينې برنډې باندې ايښودل شوې وه، چې په عبري ژبه يې «ګباتا» بلله. پيلاطوس خلکو ته وويل: دا دی ستاسې پاچا!
خلکو په زور چيغې کړې: اعدام! اعدام! پر صليب يې راوځړوئ!
پيلاطوس پوښتنه وکړه: دا تاسې څه واياست؟ آيا غواړئ چې زه ستاسې پاچا پر صليب راوځړوم؟
لويو امامانو چيغې کړې: پرته د روم له پاچا څخه موږ بل پاچا نه لرو!