عيسی ﵇ د لويو امامانو او قومي مشرانو لخوا نيول کېږي
عيسی ﵇ دا خبرې لا نه وې خلاصې کړې، چې له دوولسو نږدې اصحابو څخه يو يې يهودا اسخريوطي راورسېد. له هغه سره ډېر نور کسان هم وو، چې لرګي او تورې يې په لاس کې وې. دا خلک لويو امامانو او قومي مشرانو رالېږلي وو. مخکې خاين يهودا ورته ويلي وو: څوک چې مې ښکل کړ، هماغه عيسی دی، ويې نيسئ. دی هم مستقيم عيسی ﵇ ته راغی. ويې ويل: استاده، سلام! او ښکل يې کړ.
عيسی ﵇ وفرمايل: انډيواله، د کوم کار لپاره چې راغلی يې، نو تر سره يې کړه!
راغلي کسان رانږدې شول. عيسی ﵇ ته يې لاس ورواچاوه او ګرفتاره يې کړ. په دې وخت کې يوه صحابي توره راوايستله او د لوی امام د نوکر غوږ يې وواهه او غوټ يې ځينې پرې کړ. عيسی ﵇ ورته وفرمايل: خپله توره دې په تېکي کې کېږده! څوک چې توره چلوي، په توره مري. آيا په دې نه پوهېږې، که زه له خپل پروردګار څخه غوښتنه وکړم، نو تر دوولسو لښکرو زياتې ملايکې به زما مرستې ته راولېږي؟ خو که دا کار وکړم، نو د کلام ﷲ هغه وړاندوينه به څنګه پوره او رښتيا شي، چې وايي، د دې پېښو پېښېدل لازمي دي؟
بيا یې د نوکر پر زخمي شوي غوږ لاس کش کړ او روغ يې کړ.
له دې وروسته یې راغلو خلکو ته وفرمايل: آيا زه کوم باغي سړی يم، چې له تورو او لرګيو سره زما د نيولو لپاره راغلي ياست؟ زه خو هره ورځ د بيت المقدس په حرم شريف کې ناست وم او خلکو ته مې درسونه ورکول، خو تاسې هلته ګرفتار نه کړم. په هر حال، دا هر څه د دې لپاره پېښ شوي دي، چې د انبياوو په ليکنو کې راغلې وړاندوينې رښتيا او پوره شي.
په دې وخت کې ټولو نږدې اصحابو عيسی ﵇ پرېښود او له هغه ځايه وتښتېدل. کومو خلکو چې عيسی ﵇ ګرفتار کړی و، د لوی امام قيافا مخې ته يې وروست، چېرې چې د موسوي شريعت عالمان او قومي مشران راغونډ شوي وو. صفوان او يوحَنا په عيسی ﵇ پسې شول. يوحَنا له لوی امام سره پېژندل، نو اجازه يې تر لاسه کړه، چې په عيسی ﵇ پسې د لوی امام حويلۍ ته وردننه شي، مګر صفوان ته اجازه ورنه کړل شوه او دباندې پاتې شو. نو يوحَنا دروازې ته راغی. له دروازه وانې نوکرې سره يې خبرې وکړې او هغې صفوان پرېښود چې ننوزي. نوکرې له صفوان څخه پوښتنه وکړه، چې آيا ته خو به د هغه سړي له پيروانو څخه نه يې؟ صفوان انکار وکړ چې نه! زه نه يم!
څرنګه چې هوا سړه وه، نوکرانو او ساتونکو اور بل کړی و، چې ځانونه ګرم کړي. صفوان هم اور ته نږدې شو، تر څو ځان ګرم کړي.