عيسی ﵇ له درې ورځو وروسته د خپل بيا راژوندي کېدو په اړه خبرې کوي

د دې خبرې په اورېدو سره ځينو نږدې اصحابو يو بل ته سره وويل: دی ﵇ څه مقصد لري چې «لږه موده وروسته به مې ونه شئ ليدلای، خو تر هغه لږ وروسته به مې بيا ووينئ» او «زه خپل پروردګار ته ورتلونکی يم»؟ خصوصاً له «لږ‌ې مودې وروسته» يې څه مطلب و؟ موږ په دې باندې هېڅ پوه نه شوو.

عيسی ﵇ ته معلومه وه چې دوی له ده ﵇ څخه پوښتنه کول غواړي. نو ورته ويې فرمايل: آيا تاسې په خپلو کې زما د دغې خبرې مطلب پوښتئ؟ زه حقيقت درته وايم، هغه څه چې له ما سره پېښېدونکي دي، پر هغه به تاسې ډېره ژړا او وير وکړئ، مګر د دنيا خلک به خوشحالي وکړي. تاسې به په غم اخته شئ، مګر وروسته به ستاسې غم په خوشحالۍ بدل شي. مثال يې داسې دی، لکه پر يوې ښځې چې د زېږون درد راشي، مګر کله چې خپل ماشوم راوړي، درد او غم يې هېر شي، ځکه چې د خپل ماشوم په ليدو يوازې د خوشحالۍ احساس لري. اوس ستاسې د غم او تکليف وخت دی، خو وروسته به ما بيا ووينئ. هغه وخت به مو زړونه په خوشحالۍ وغوړېږي او دغه خوشحالي به هېڅوک له تاسې څخه نه شي اخيستلای.

زه تاسې ته سلامتي او د زړه ډاډ درپرېږدم، يعنې هغه سلامتي او د زړه ډاډ چې زه يې لرم، تاسې ته يې هم دربخښم. زه د داسې سلامتۍ او د زړه د ډاډ ورکوونکی نه يم، چې د دينا خلک يې ورکوي. نو په همدې خاطر تاسې زړه مه تنګوئ او مه وېرېږئ. تاسې زما له خولې اورېدلي دي چې «زه تلونکی يم، خو تاسې ته به بېرته راشم.» که تاسې له ما سره مينه درلودلای، نو تاسې به خوشحاله وای چې زه خپل پروردګار ته ورځم، ځکه چې زما پروردګار له ما څخه لوړ موقف لري. ما د دې واقعاتو په باره کې تر پېښېدو مخکې درته ويلې دي، تر څو له پېښېدو سره به يې زما په خبرو يقين وکړئ.

اوس ډېر وخت نه دی راپاتې چې له تاسې سره خبرې وکړم، ځکه چې ظالم شيطان راروان دی، چې د دنيا پر خلکو باندې واک چلوي. که څه هم هغه پر ما هېڅ قدرت نه لري، خو څه چې ﷲ ﷻ فرمايلي دي، زه به هغه تر سره کړم، تر څو د دنيا خلک وپوهېږي چې زه له خپل پروردګار سره مينه لرم. اوس راځئ چې ځو.