د پنا د اختر لمانځنه

بيا عيسی ﵇ دوی ته وفرمايل: ما د زړه له تله غوښتل چې د خپل مرګ له تکليفونو څخه مخکې د اختر دا ډودۍ له تاسې سره وخورم. زه تاسې ته وايم، چې زه به د اختر دا ډوډۍ بيا ونه خورم، تر څو چې د پنا د اختر مقصد په الهي سلطنت کې نه وي پوره شوی.

بيا عيسی ﵇ د انګورو د اوبو يوه پياله راواخيسته، شکر يې وکړ او خپلو اصحابو ته يې وفرمايل: دا واخلئ او هر يو يې وڅښئ. زه تاسې ته وايم، چې زه به بيا تر هغه د انګورو اوبه ونه څښم، تر څو د ﷲ ﷻ سلطنت نه وي قايم شوی. *

بيا يې يوه ډوډۍ راواخيسته، شکر يې ادا کړ او څو ټوټې يې کړه. پر اصحابو يې ووېشله او ويې فرمايل: دغه ډوډۍ زما د بدن په مثال ده، چې زه يې ستاسې لپاره قربانوم. دغه ډوډۍ وخورئ او له دې وروسته يې زما د ياد د تازه کولو لپاره خورئ.

همدارنګه له ډوډۍ وروسته عيسی ﵇ پياله راواخيسته او ويې فرمايل: دغه پياله زما د وينو په مثال ده، چې ستاسې لپاره به توی شي او په وسيله به يې خدای ﷻ يو نوی عهد او تړون قايم کړي.

دلته له ما سره پر دې دسترخوان باندې يو څوک شته، چې خيانت به راسره وکړي او مخالفينو ته به مې په لاس ورکړي. بې شکه چې زه د بني آدم سردار به د ﷲ ﷻ له حکم او ارادې سره سم له دې دنيا څخه رحلت وکړم، خو پر هغه چا دې افسوس وي، چې له ما سره خيانت کوي او مخالفينو ته مې په لاس ورکوي.

بيا ټولو اصحابو په خپلو کې سره وويل، چې په موږ کې به هغه خاين سړی څوک وي، چې دغسې ناوړه کار به وکړي؟

*د پنا اختر د نجات يوه نښه ده، چې د موسی ﵇ په زمانه کې خدای ﷻ خپل منتخب قوم بني اسراييلو ته د مصريانو له غلامې څخه نجات ورکړ او په خپله پنا کې يې وساته. د دغه اختر په لمانځنه کې عیسی ﵇ دې ته اشاره کوي، چې دی ﵇ به ډېر ژر قرباني شي او د دغه نیک کار په وسيله به یې خدای ﷻ خپل منتخب بنده ګان د ګناه له قيد څخه وژغوري، له ابدي هلاکت څخه به يې په خپله پنا کې وساتي او په الهي سلطنت کې به يې په خپله شانداره مېلمستيا کې شامل کړي.