د حساب او کتاب د ورځې په اړه

بيا عيسی ﵇ وفرمايل: کله چې د بني آدمو سردار په خپل شان او شوکت سره د ټولو ملايکو په ملتيا راشي، نو پر خپل شاندار تخت به کېني. د نړۍ د ټولو قومونو خلک به يې يو ځای مخې ته راشي او هغه به دوی په داسې ډول سره جلا کړي، لکه شپون چې پسونه له وزو څخه جلا کوي. پر خپل ښي اړخ کې به پسونه راجمع کړي، خو وزې به په خپل کيڼ اړخ کې راټولې کړي. بيا به پاچا خپلې ښۍ خوا ته راټولو کسانو ته وفرمايي: زما د پروردګار نازوليو! راشئ، هغه سلطنت د وراثت په ډول تر لاسه کړئ، کوم چې د کايناتو له پيدايښت څخه مخکې ستاسې لپاره تيار شوی دی، ځکه کله چې وږی وم، تاسې ما ته خوراک راکړ. کله چې تږی وم، څښاک مو راکړ. زه بېګانه وم، ما ته مو په خپل کور کې ځای راکړ. لڅ وم، جامې مو راپه تن کړې. ناروغ وم، زما پالنه مو وکړه. په زندان کې وم، زما پوښتنه مو وکړه.

بيا به هغه نېک خلک ورته ووايي: ای مولا! موږ تاسې کله وږی وليدلئ او خوراک مو درکړ؟ کله مو تږی وليدلئ او څښاک مو درکړ؟ کله مو بېګانه وليدلئ او په خپل کور کې مو ځای درکړ؟ کله مو لڅ وليدلئ او کالي مو درپه تن کړل؟ کله مو ناروغ او يا په زندان کې وليدلئ او ستاسې پوښتنه مو وکړه؟

پاچا به ورته ووايي: زه حقيقت درته وايم، کله چې تاسې زما د دغو وروڼو له جملې څخه له کمترين کس سره دغه شان عمل وکړ، نو په حقيقت کې مو دا عمل له ما سره کړی دی.

بيا به پاچا خپلې کيڼې خوا ته موجودو کسانو ته وفرمايي: ای دوزخيانو! له مخې مې لرې شئ! ستاسې ځای هغه نه ختمېدونکی اور دی، چې د ابليس او د هغه تر امر لاندې شيطانانو لپاره تيار شوی دی، ځکه کله چې وږی وم، تاسې خوراک رانه کړ. زه چې تږی وم، څښاک مو رانه کړ. بېګانه وم او په خپل کور کې مو ځای رانه کړ. لڅ وم، جامې مو راپه تن نه کړې. ناروغ او په زندان کې وم، زما پوښتنه مو ونه کړه.

هغوی به ووايي: ای مولا! موږ تاسې کله وږی، تږی، بېګانه، لڅ، ناروغ او يا په زندان کې وليدلئ او ستاسې مرسته مو ونه کړه؟

پاچا به ورته وفرمايي: زه حقيقت درته وايم، که تاسې زما د دغو وروڼو له جملې څخه له کمترين کس سره دغه شان عمل ونه کړ، نو په حقيقت کې مو دا عمل له ما سره نه دی کړی.

بيا به دغه کسان د ابدي عذاب ځای ته ولېږل شي، خو نېکوکاران به د نېکمرغۍ د ابدي ژوند ځای ته ولېږل شي.