د خدای ﷻ له خوا راکړل شوي مسووليتونه بايد په سمه توګه ادا کړو

عيسی ﵇ وفرمايل: د الهي سلطنت دا مثال واورئ. يو خان سړی دی، چې په مخ کې سفر لري. نو خپل نوکران راغواړي، تر څو خپل مال او دولت وروسپاري. هر يوه ته له خپل لياقت سره سم دولت ورسپاري. يوه ته د سرو زرو پنځه کڅوړې ورکوي. بل ته دوه او درېيم ته يوه کڅوړه ورکوي او بيا په سفر ځي. لومړنی نوکر ځي. پر هغو پنځو کڅوړو باندې تجارت کوي او پنځه کڅوړې نورې هم پرې ګټي. همدارنګه دوهم نوکر هم په دوو کڅوړو دوې نورې ګټي. خو درېيم نوکر ځي، ځمکه کيندي او هغه يوه ورکړل شوې کڅوړه پکې تر خاورو لاندې پټوي.

تر اوږدې مودې وروسته د نوکرانو مالک له سفره بېرته راځي او له نوکرانو څخه د خپلو پيسو حساب غواړي. لومړنی نوکر رامخکې شي او ووايي: صاحبه، تاسې ما ته پنځه کڅوړې راسپارلې وې. دا دي پنځه نورې مې پرې ګټلې دي.

مالک ورته ووايي: آفرين! ته يو ښه او متعبر نوکر يې! تا چې په داسې يوه کوچني کار کې ځان د اعتبار وړ ثابت کړ، نو زه به تا ته پر ډېرو کارونو مديريت درکړم. راشه، د خپل مالک په خوشحالۍ کې شريک شه!

بيا دويم نوکر رامخکې شي او ووايي: صاحبه، تا ما ته دوې کڅوړې راسپارلې وې. دا دي دوې نورې مې هم پرې ګټلې دي.

مالک ورته ووايي: پر تا دې آفرين وي! ته ښه او متعبر نوکر يې! تا چې په يوه کوچني کار کې خپل اعتبار ثابت کړ، نو پر ډېرو شيانو به اختيار درکړم. راشه، ته هم د خپل مالک په خوشحالۍ کې شريک شه!

په پای کې درېيم نوکر رامخکې شي او ووايي: صاحبه، زه پوهېدم چې تاسې سرزوری سړی ياست. هغه فصل رېبئ، چې نه مو دی کرلی او له هغه ځايه حاصلات راټولوئ، چېرې چې تخم مو نه دی پاشلی. نو په دې وېره کې زه ولاړم. ستا هغه يوه کڅوړه مې په ځمکه کې پټه کړه. اوس دا ده خپله کڅوړه مو واخلئ.

مالک ورته ووايي: ای خرابکاره او لټ نوکره! که ته پوهېدې چې زه هغه فصل رېبم، چې نه مې دی کرلی او له هغه ځايه څخه حاصلات راټولوم، چېرې چې تخم مې نه دی پاشلی، نو تا خو بايد زما پيسې کوم چا ته په ګټه ورکړې وای، چې له راستنېدو وروسته مې يې فايده تر لاسه کړې وای.

بيا مالک حاضرو کسانو ته امر کوي: له ده څخه دا يوه کڅوړه واخلئ او هغه نوکر ته يې ورکړئ، چې لس کڅوړې ورسره دي. څوک چې له لږ شي سره اعتبار ښکاره کړي، هغه ته به نور هم ورکول کېږي او هغه هم په لا ډېره کچه، مګر څوک چې له لږ شي سره اعتبار ښکاره نه کړي، نو هر څه چې يې په لاس کې وي، هغه به هم ترې واخيستل شي. اوس دا بې ګټې نوکر په توره تياره کې ورواچوئ. هلته به ژاړي او غاښونه به چيچي.