له آسمانه ځمکې ته د عيسی ﵇ د بېرته راتګ په اړه وړاندوينه

عيسی ﵇ زياته کړه: په آسمان کې به له لمر، سپوږمۍ او ستورو سره ډېرې عجيبې نښانې راښکاره شي او په ځمکه کې به ټول قومونه د سمندر د اوبو او څپو شور او زوږ ته پرېشانه او ناکراره شي. آسماني اجسام به په لړزېدو شي، چې له امله به يې ټول خلک پر ځمکه د راتلونکو مصيبتونو له وېرې او ډار څخه بې هوښه شي. بيا به وګورئ چې زه د بني آدمو سردار به له قدرت او ډېر شان او شوکت سره پر ورېځو باندې راځم. کله چې دا پېښې پيل شي، نو نېغ ودرېږئ او سترګې مو آسمان ته ونيسئ، ځکه چې ستاسې د خلاصون وخت رارسېدلی دی!

مګر د دې پېښو د ټاکلې ورځې او ساعت په اړه هېڅوک نه پوهېږي، چې کله به تر سره شي، نه د آسمان ملايکې او نه هم د خدای ﷻ خاص نازولی. دا يوازې پروردګار ته معلوم دي. کله چې د بني آدمو سردار راشي، نو حالات به د نوح ﵇ د زمانې په شان وي. تر طوفان مخکې خلکو په عادي توګه خوراک او څښاک کاوه او ودونه يې کول. کله چې نوح ﵇ په کښتۍ کې سپور شو، دوی لا هغه وخت په راتلونکي عذاب نه وو خبر. بيا طوفان پيل شو او دوی ټول يې غرق او هلاک کړل. کله چې د بني آدمو سردار راشي، نو حالات به هماغسې وي.

هغه وخت به داسې وشي، چې دوه کسان به په کرونده کې په کار لګيا وي. يو به يې بوتلل شي او بل کس به يې پر هغه ځای پاتې شي. دوې ښځې به په يوې مېچنې باندې غنم ميده کوي. يوه به يې بوتلل شي او بله به يې پاتې شي.

له دې خاطره تاسې بېداره اوسئ! ځکه، نه پوهېږئ، چې مولا به مو په کومه ورځ راشي. تاسې دا مثال په ياد ولرئ: که چېرته د کور خاوند ته علم وي، چې د شپې په کوم وخت کې غل راځي، نو شپه به په ويښه تېره کړي او کور به د غلو له شره وساتي. نو تاسې هم هماغه ډول تيار اوسئ، ځکه د بني آدمو سردار به هغه وخت راشي، چې تاسې به هېڅ ورته په تمه نه وئ.

عيسی ﵇ پسې زياته کړه: اعتباري او هوښيار نوکر هغه دی، چې د کور مالک يې پر نورو نوکرانو باندې مقرر کړي، تر څو پر وخت هغوی ته ډوډۍ ورکړي. کله چې د کور مالک بېرته راشي او نوکر د خپلو مسووليتونو د ادا کولو په حال کې وګوري، نو دغه نوکر به څومره نېکمرغه وي. زه حقيقت درته وايم، چې د کور مالک به د ده په لاس کې د خپل ټول مال او جايداد اداره ورکړي. خو که نوکر بدکاره وي او په زړه کې ووايي، چې زما د مالک راتګ به وځنډېږي او که د نورو نوکرانو په وهلو لاس پورې کړي او د شرابو او کبابو محفلونه وکړي، نو د کور مالک به په داسې ورځ بېرته راشي، چې نوکر هېڅ ورته په تمه نه وي. ده ته به سخته سزا ورکړي او انجام به يې له منافقينو سره وي. هلته به هغوی ژاړي او غاښونه به چيچي.