عيسی ﵇ د بيت المقدس د شهيد کېدو په اړه وړاندوينه کوي

له دې وروسته عيسی ﵇ له حرم شريف څخه راووت. بيا ځينو کسانو د بيت المقدس د عبادتګاه په صفتونو پيل وکړ او ويل يې چې دا په څومره ښکلو ډبرو او نذرانو باندې ښايسته شوې ده! د دې په اورېدو سره عيسی ﵇ وفرمايل: دلته چې کوم شيان وينئ، داسې ورځ به راشي، چې ټول به ويران شي او يوه ډبره به پر بلې پر ځای پاتې نه شي.

نږدې اصحابو له عيسی ﵇ څخه پوښتنه وکړه: استاده، دا هر څه به کله پېښېږي او په کومه نښه به وپوهېږو، چې د دغو پېښو وخت رانږدې شوی دی؟

عيسی ﵇ وفرمايل: تاسې بايد پام وکړئ، چې څوک مو دوکه نه کړي، ځکه چې ډېر کسان به زما په نوم راشي او ادعا به وکړي، چې زه د ﷲ ﷻ ټاکل شوی يم او د قيامت ورځ رانږدې شوې ده، خو تاسې د هغوی په خبرو باندې باور ونه کړئ! کله چې تاسې د جنګونو او انقلابونو په اړه خبرې واورئ، نو وار مه خطا کوئ، ځکه چې اړينه ده دا پېښې لومړۍ تر سره شي، خو معنی يې دا نه ده چې سمدستي به قيامت شي.

بيا عيسی ﵇ وفرمايل: يو قوم به د بل قوم پر ضد او يوه پاچاهي به د بلې پاچاهۍ پر ضد ودرېږي، په ډېرو ځايونو کې به ډېرې شديدې زلزلې وشي، د نړۍ په ګوټ ګوټ کې به کاختۍ او آفتونه راشي، ډېرې وحشتناکې پېښې به تر سره شي او په آسمان کې به لويې لويې نښې راښکاره شي. خو له دغو ټولو پېښو څخه د مخه به خلک تاسې ونيسي او وبه مو ځوروي. ديني محکمو ته به مو کش کړي او په بنديخانو کې به مو واچوي. د پرېکړې لپاره به د پاچاهانو او حاکمانو مخې ته بوتلل شئ او دا ټول په دې خاطر چې تاسې زما پيروان ياست. په هغه وخت کې به تاسې ته دا موقع په لاس درشي، چې خلکو ته زما په باره کې شاهدي ورکړئ. نو ستاسې په زړونو کې دې دا وېره نه وي، چې موږ به د تورونو په مقابل کې له ځانه څنګه دفاع وکړو؟ ځکه چې زه به تاسې ته داسې خبرې او حکمت درکړم، چې په مقابل کې به يې ستاسې ټول مخالفين د درېدلو او يا ردولو توان ونه لري. مور او پلار، وروڼه او خويندې، خپلوان او دوستان به هم له تاسې سره خيانت وکړي او د مخالفينو په لاس به مو ورکړي او هغوی به له تاسې څخه ځينې کسان مړه کړي. له دې کبله چې تاسې زما پيروان ياست، ټول خلک به کرکه او نفرت درڅخه کوي، خو ستاسې يو تار وېښته به هم ضايع نه شي. که تاسې په ازموېښت کې په صبر سره خپل ايمان ټينګ وساته، نو د ابد لپاره به مو ځانونه ساتلي وي.

کله چې مو وليدل پوځونو له څلورو خواوو څخه يروشلم محاصره کړی دی او په سپېڅلي ځای کې هغه پليت او کرکجن شی ولاړ وي، چې وړاندوينه يې د دانيال پيغمبر ﵇ په ليکنه کې راغلې ده، نو پوه شئ چې د يروشلم د ويرانېدو وخت رارسېدلی دی. هغه مهال دې د يهوديې خلک غرونو ته وتښتي، د يروشلم اوسېدونکي دې له ښاره فرار وکړي او د اطرافو خلک دې ښار ته نه داخلېږي، ځکه چې هغه به د ﷲ ﷻ د سزا ورکولو ورځې وي، تر څو ټولې هغه وړاندوينې چې په کلام ﷲ کې راغلي دي، پوره او رښتيا شي. نو په هغو ورځو کې به د هغو ښځو حال څومره د افسوس وړ وي، چې په نس کې يې کوچنی وي او يا خپل کوچني ته تی ورکوي، ځکه چې پر دې ځمکه به ډېر سخت حالات وي او پر دې ولس به الهي غضب نازل شي. يو شمېر بني اسراييل به د تورې له تېغه تېر شي او پاتې نور به يې د نړۍ ټولو قومونو ته بنديان بوتلل شي. پردي قومونه به يروشلم تر هغې تر پښو لاندې کړي، چې د دوی د حکومت ټاکلې موده پوره شي.