د روم امپراتور ته د ماليې ورکولو په اړه له عيسی ﵇ څخه پوښتنه

له دې وروسته افريسيان سره راغونډ شول. د دې لپاره يې یوه لاره سنجوله، تر څو د عيسی ﵇ له خولې څخه يوه داسې خبره راوباسي، تر څو يې پر خلاف وکاروي. د دې په خاطر يې خپل څو پيروان او د هيرود حاکم څو طرفداران ورولېږل. دغو خلکو ورته وويل: استاده، موږ پوهېږو، چې تاسې رښتينی ياست او د ﷲ ﷻ لار په پوره رښتينولۍ سره خلکو ته ورښياست. نه د چا لحاظ کوئ، نه د چا مخ ته ګورئ. نو موږ ته وواياست: آيا د شريعت له مخې دا جايزه ده، چې د روم پاچا ته باج او ماليه ورکړو او که نه؟

عيسی ﵇، چې د دوی په ټګمارۍ خبر و، وفرمايل: ای منافقينو! له ما ولې امتحان اخلئ؟ ما ته هغه سکه راوښياست، چې په باج او ماليه کې يې ورکوئ.

دوی هم يو دينار ورښکاره کړ. عيسی ﵇ وپوښتل: پر دې سکې باندې د چا نوم او تصوير حک شوی دی؟

دوی وويل: د روم د پاچا.

عيسی ﵇ ورته وفرمايل: ښه نو، څه چې د روم د پاچا حق وي، د روم پاچا ته يې ورکړئ او څه چې د ﷲ ﷻ حق وي، ﷲ ﷻ ته يې ورکړئ.

د دې ځواب په اورېدو سره دوی حيران شول او له هغه ځايه ولاړل.