د الهي سلطنت د مخالفينو انجام

بیا عیسی ﵇ وفرمایل: يو بل مثال هم واورئ! يو زمينداره سړی د انګورو باغ جوړوي. شاوخوا يې دېوال پورته کوي. بيا د څارنې يو برج او د انګورو د اوبو ايستلو لپاره يو حوض جوړوي. له دې وروسته باغ څو باغوانانو ته په اجاره ورکوي او په سفر ځي. کله چې د انګورو د حاصل وخت راورسېږي، د باغ مالک خپل يو څو نوکران باغوانانو ته ورولېږي، چې له حاصلاتو څخه خپله برخه ورڅخه واخلي. باغوانان نوکران ونيسي. يو ووهي، بل ووژني او درېيم په ډبرو وولي. له دې وروسته د باغ مالک له لومړي ځل څخه ډېر نوکران ورولېږي. دا وار هم باغوانان له دوی سره هماغسې چلند وکړي.

په پای کې د باغ مالک خپل زوی ورولېږي. ووايي، چې دوی به زما د زوی عزت وکړي. خو کله چې د مالک زوی باغ ته ورنږدې کېږي، باغوانان يې وويني او په خپلو کې سره ووايي: له پلار وروسته هغه وارث دی. راځئ چې مړ يې کړو، چې دغه باغ موږ ته راپاتې شي. نو باغوانان د مالک زوی ونيسي، له باغ څخه يې وباسي او مړ يې کړي.

اوس چې کله د باغ مالک پخپله راشي، نو له باغوانانو سره به څه وکړي؟

دوی وويل: هغه خرابکاره باغوانان به په بد مرګ مړه کړي او باغ به داسې نورو باغوانانو ته په اجاره ورکړي، چې د حاصلاتو ټاکل شوې اندازه پر وخت ورکړي.

عيسی ﵇ وفرمايل: آيا تاسې په کلام ﷲ کې دا نه ده لوستلې، چې وايي: «کومه ډبره چې بنايانو بې کاره بللې وه او رد کړې يې وه، هغه بنيادي ډبره جوړه شوه. دا د ﷲ ﷻ کار دی، چې موږ يې په ليدو خوشحال او حيران يو.»

زه تاسې ته وايم، ﷲ تعالی به له تاسې څخه د الهي سلطنت برخه بېرته واخلي او داسې يوه ولس ته به يې ورکړي، چې له الهي ارادې سره سم عمل وکړي او ثمره ورکړي. څوک چې پر دې ډبره ولوېږي، ټوټه ټوټه به شي او پر چا چې دا ډبره ولوېږي، نو هغه به چخپيت شي.

لويو امامانو او افريسيانو چې دا خبرې واورېدې، پوه شول چې له خرابکاره باغوانانو څخه د عيسی ﵇ مراد موږ يو. غوښتل يې دی ﵇ همالته ونيسي، خو د خلکو له وېرې يې څه ونه کړل، ځکه خلکو دی ﵇ د پيغمبر په توګه منلی و.