ځينې خلک د خدای ﷻ پر ځای له خلکو څخه عزت غواړي

که څه هم عيسی ﵇ خلکو ته ډېرې معجزې ښودلې وې، خو دوی ايمان نه و پرې راوړی. په دې ډول د اشعيا نبي هغه خبره رښتيا او پوره شوه چې فرمايي: «يا ﷲ! زموږ پيغام چا منلی دی او ستا د قدرت لاس چا ته ښودل شوی دی؟»

ځکه چې د دې خلکو نصيب نه و چې ايمان راوړي. دا هم د اشعيا نبي خبره ده چې فرمايي: «ﷲ تعالی د دوی سترګې ړندې کړې دي او زړونه يې ورکلک کړي دي. د دې په نتيجه کې په سترګو څه نه شي ليدای او په زړونو کې په څه نه شي پوهېدای. ما ته رجوع نه کوي، تر څو يې روغ او شفاياب کړم.»

دغه خبره اشعيا نبي ډېر پخوا ځکه ويلې وه، چې د المسيح شان او شوکت يې ليدلی و.

د دې سربېره چې د خلکو سترګې ړندې وې او زړونه يې کلک و، مګر داسې زيات شمېر بني اسراييلي مشران هم وو، چې پر عيسی ﵇ يې ايمان راوړی و، خو د افريسيانو له وېرې يې په ښکاره خپل ايمان نه څرګنداوه. دوی ويل: که موږ پر خپل ايمان اقرار وکړو، نو له بني اسراييلي جماعت څخه به مو وشړي. دغو خلکو له خدای څخه د عزت تر لاسه کولو پر ځای له انسانانو څخه د عزت تر لاسه کول، غوره کړل.