عيسی ﵇ بيت المقدس له صرافانو او نورو سوداګرو څخه پاکوي
بيا عيسی ﵇ د بيت المقدس حرم شريف ته داخل شو. ګوري، چې خلک د قربانۍ لپاره د حيواناتو په اخيستلو او خرڅولو بوخت دي. نو دا ټول خلک يې له بيت المقدس څخه وشړل او د صرافانو مېزونه او د کوترو خرڅوونکو څوکۍ يې پر بل مخ واړولې. ويې فرمايل: په کلام ﷲ کې دا د خدای ﷻ فرمان راغلی دی: «زما کور به د دعا او عبادت لپاره وي»، خو تاسې له هغه څخه د غلو ځاله جوړه کړې ده.
له هغه وروسته په حرم شريف کې عيسی ﵇ ته ړانده او شل خلک راغلل او ده ﵇ ټولو ته شفا ورکړه. د بني اسراييلو لويو امامانو او د موسوي شريعت عالمانو دغه حيرانوونکې معجزې وليدلې او د ماشومانو نارې يې هم واورېدلې چې ويل يې: ستاينه دې وي د داود ﵇ د تخت وارث لره!
نو دوی ډېر په قهر شول او پر عيسی ﵇ يې نيوکه وکړه، چې آيا ته د دغو ماشومانو خبرې نه اورې؟
عيسی ﵇ ورته وفرمايل: هو، زه يې خبرې اورم. آيا تاسې په کلام ﷲ کې دا نه ده لوستلې چې وايي: «يا ﷲ! تا د ماشومانو، بلکې د شيدې رودونکو کوچنيانو په ژبو باندې حمد او ثنا راوستلې ده.»