په يروشلم کې د عيسی المسيح شاندار هرکلی
ډېر بني اسراييل خبر شول، چې عيسی ﵇ کلي ته تشريف راوړی دی. نو راغلل چې ويې ويني، خو يوازې هغه ﵇ نه، بلکې ايلعازر هم وويني، ځکه چې دغه خبر خپور شوی و، چې عيسی ﵇ ايلعازر له مرګه بېرته راژوندی کړی دی. په بله ورځ زيات شمېر خلک، چې د اختر د لمانځنې په خاطر يروشلم ته راغلي وو، خبر شول چې عيسی ﵇ راروان دی. نو يې د خورما د ونو پاڼې راواخيستلې او هرکلي ته يې راووتل. دا نارې يې کولې چې حمد دې وي خدای لره! مبارک دې وي هغه کس، چې د ﷲ ﷻ په استازيتوب راغلی دی! د بني اسراييلو پاچا دې مبارک وي!
د عيسی ﵇ د هرکلي لپاره يو ځوان خر آماده شوی و، تر څو دی ﵇ پرې سپور راشي. په دې سره هغه وړاندوينه رښتيا شوه چې فرمايي: «د يروشلم اوسېدونکو! مه وېرېږئ! وګورئ ستاسې پاچا پر ځوان خره سپور درته راروان دی.»
د عيسی ﵇ نږدې اصحاب هغه وخت د دغې وړاندوينې په معنی او مطلب نه پوهېدل، خو وروسته چې عيسی ﵇ په آسمانونو کې د شان او شوکت مقام ته پورته کړل شو، دغه وړاندوينه او هغه کارونه چې عيسی ﵇ تر سره کړي وو، دوی ته ورپه ياد شول.
مخکې چې عيسی ﵇ ايلعازر له قبره رابللی او بېرته راژوندی کړی و، نو هغه ډېر شمېر شاهدانو د دې معجزې کيسه نورو ته کړې وه. عيسی ﵇ ته د دومره ډېرو خلکو د راتګ سبب همدا و، چې د معجزې خبر ورته رسېدلی و. افريسيانو چې دغه حال وليد، يو بل ته يې سره وويل: وګورئ! ټوله نړۍ هغه ته ورماته ده! موږ په خپل مقصد کې پاتې راغلو. موږ او تاسې د هغه په راګرځولو کې هېڅ ونه شوای کړای.
يوه ورځ د افريسي فرقې پيروانو له عيسی ﵇ څخه پوښتنه وکړه: د ﷲ ﷻ سلطنت به څه وخت قايم شي؟
عيسی ﵇ وفرمايل: د الهي سلطنت قايمېدل داسې شی نه دی، چې په سترګو يې خلک وويني او يا يې په اړه ووايي چې وګورئ، دا دی او يا هغه دی! ځکه چې د ﷲ ﷻ سلطنت ستاسې منځ ته وختي لا راغلی دی.
کله چې عيسی ﵇ يروشلم ته نږدې شو او ښار يې تر سترګو شو، نو د يروشلم پر حال يې ژړا راغله او ويې فرمايل: ای يروشلمه، کاشکې ته نن په هغو خبرو پوهېدلی وای، چې سوله او سلامتي منځ ته راوړي، خو اوس ستا له سترګو څخه پټې دي. د دې ورځ راتلونکې ده چې ستا دښمنان به ستا پر خلاف سنګر جوړ کړي، محاصره به دې کړي او له هرې خوا څخه به حملې درباندې وکړي. تا به له خپلو اوسېدونکو سره يو ځای نېست او نابود کړي او يوه ډبره به هم پر خپل ځای روغه پرې نه ږدي. د دې ټولو لامل دا دی چې تا په هغه موقع ځان پوه نه کړ، چې ﷲ ﷻ زما په وسيله د رحم نظر درباندې کړی و.
کله چې عيسی ﵇ يروشلم ته داخل شو، د ښار ټول اوسېدونکي په جوش او خروش کې شول او له يو بل څخه يې پوښتل، چې دا سړی څوک دی؟
له عيسی ﵇ سره روانو خلکو دوی ته وويل: دا عيسی پيغمبر دی، چې د ګليل د ناصرت ښار دی.