ماريا د عيسی ﵇ پر پښو قيمتي عطر پاشي

د پنا له اختره شپږ ورځې د مخه عيسی ﵇ بيت عنيا کلي ته تشريف يووړ. دا هغه کلی و، چې ايلعازر پکې اوسېد، هغه ايلعازر چې عيسی ﵇ له مرګه بېرته راژوندی کړی و. دلته د عيسی ﵇ په وياړ يوه مېلمستيا جوړه شوه، چې ايلعازر له مېلمنو سره ناست و او له ده ﵇ سره يې يو ځای ډوډۍ خوړله او خور يې مرتا د مېلمنو پالنه کوله. بلې خور يې ماريا نيم ليتره د سنبلو قيمتي سوچه عطر راواخيستل. د عيسی ﵇ پر مبارکو پښو يې توی کړل او په خپلو وېښتانو يې پښې ورپاکې کړې. د عطرو خوشبويي په ټول کور کې خپره شوه. په دې وخت کې يو صحابي يهودا اسخريوطي، چې وروسته يې له عيسی ﵇ سره خيانت وکړ، وويل: دغو عطرو د درې سوو دينارو ارزښت درلود! بايد خرڅ شوي وای او پيسې يې پر غريبانو وېشل شوې وای! يهودا دغه خبره په دې خاطر ونه کړه، چې د غريبانو په غم کې و، بلکې په دې خاطر چې غل و. هغه به د نږدې اصحابو د پيسو کڅوړه ساتله او کله نا کله به يې يو څه پيسې ترې پټولې.

عيسی ﵇ يهودا ته وفرمايل: ماريا خپل کار ته پرېږده! دې چې دا عطر راباندې وپاشل، داسې يې وګڼه، چې مخکې له مخکې يې زما د جسد د ښخېدو لپاره تياری نيولی دی. غريبان به همېشه درسره وي، خو زه به هميشه درسره نه يم.