د يو محصول اخيستونکي توبه کول
له دې وروسته عيسی ﵇ اريحا ښار ته داخل شو او پر لاره روان و. په دغه ښار کې د زکي په نامه يو شتمن سړی اوسېد، چې د محصول اخيستونکو مشر و. هغه غوښتل، چې عيسی ﵇ په خپلو سترګو وويني، خو نه يې شوای ليدلای، ځکه چې قد يې ټيټ و او د خلکو ګڼه ګوڼه هم زياته وه. پر کومه لاره چې عيسی ﵇ روان و، نو زکي منډه کړه او د لارې په څنګ کې د انځر يوې ونې ته وخوت. کله چې عيسی ﵇ د هغې ونې لاندې ورسېد، پورته يې وکتل او ويې فرمايل: زکي، ژر راښکته شه! زه نن بايد ستا په کور کې مېلمه شم.
زکي هم په بېړه راښکته شو او په ډېرې خوشحالۍ سره يې عيسی ﵇ خپل کور ته بوت.
د دې په ليدو سره ټولو خلکو ناخوښي ښکاره کړه او ويې ويل: دی ولې د يو ګناهکار سړي په کور کې مېلمه شوی دی؟
زکي ودرېد او عيسی ﵇ ته يې وويل: ای مولا! زه له همدا نن څخه خپله نيمه شتمني پر مسکينانو وېشم او له چا څخه چې مې پيسې په ناحقه اخيستې دي، هغوی ته يې څلور برابره بېرته ورکوم.
عيسی ﵇ وفرمايل: نن په دغه کور کې نجات راغلی دی، ځکه چې دا سړی هم د ابراهيم ﵇ له اولادې څخه دی. زه د بني آدمو سردار د دې لپاره راغلی يم، چې بې لارې خلک ولټوم او نجات ورکړم.