عيسی ﵇ يو ړوند بينا کوي
کله چې عيسی ﵇ د اريحا ښار ته نږدې شو، هلته د لارې پر څنډه يو ړوند سړی ناست و او خيرات يې ټولاوه. هغه چې د دومره ډېرو خلکو د ګرځېدو غږ واورېد، پوښتنه يې وکړه چې دا څه کيسه ده؟
خلکو ورته وويل چې عيسی ناصرتي پر دې لارې تېرېږي.
نو ړانده سړي پر عيسی ﵇ ناره کړه: ای عيسی، د داود ﵇ د تخت وارثه! پر ما رحم وکړه!
هغه خلک چې تر عيسی ﵇ مخکې روان وو، په سختو ټکو يې ړانده سړي ته وويل: غلی شه!
خو هغه نور هم په چيغو شو او ويل يې: ای عيسی! د داود ﵇ د تخت وارثه! پر ما رحم وکړه!
عيسی ﵇ ودرېد او امر يې وکړ، چې دغه سړی ما ته راولئ.
کله چې يې سړی نږدې راوست، عيسی ﵇ پوښتنه ترې وکړه: ووايه، چې زه له تا سره څه مرسته کولای شم؟
سړي وويل: مولا، زه غواړم چې ما ته د سترګو ديد بېرته راکړئ.
عيسی ﵇ وفرمايل: بينا شه! تا د خپل ايمان له برکته نجات پيدا کړی دی.
په هماغه لحظه سړي ته د سترګو ديد بېرته وروګرځېد او په داسې حال کې چې د خدای ﷻ لويي او ثنا يې بيانوله، په عيسی ﵇ پسې روان شو. د دې معجزې په ليدو سره ټولو خلکو د ﷲ ﷻ حمد او ثنا وويله.