د يعقوب او يوحَنا مور له عيسی ﵇ څخه خپلو زامنو ته موقف غواړي

بيا د يعقوب او يوحَنا مور له خپلو زامنو سره عيسی ﵇ ته راغله. په تعظيم سره يې پښو ته ورپرېوته او عرض يې وکړ: زه له تاسې څخه يوه غوښتنه لرم.

عيسی ﵇ وفرمايل: مهرباني وکړه، خپله غوښتنه دې ووايه.

هغې وويل: کله چې ستاسې سلطنت قايم شي، نو زما دوو زامنو ته دا وياړ ورکړئ، چې ستاسې په ښي او کيڼ اړخ کې کېني.

عيسی ﵇ يې زامنو ته وفرمايل: تاسې نه پوهېږئ چې د څه شي غوښتنه کوئ. آيا تاسې هغه تريخ جام څښلای شئ، چې زه به يې ډېر ژر وڅښم؟

دوی په ځواب کې وويل: بلې هو، څښلای يې شو.

عيسی ﵇ ورته وفرمايل: بې شکه چې تاسې به زما په څېر تريخ جام وڅښئ، خو په خپل ښي او کين اړخ کې د چا کېنول زما په اختيار کې نه دي. دا مقامونه د هغو کسانو دي، چې زما پروردګار ټاکلي دي.

کله چې هغه لس نور نږدې اصحاب د يعقوب او يوحَنا په غوښتنه خبر شول، ډېر ترې خفه شول. عيسی ﵇ دوولس واړه راټول کړل او ورته يې وفرمايل: د دې دنيا حاکمان له خلکو سره آمرانه چلند کوي او لوړپوري کسان پر ولس ناوړه واک چلوي. مګر تاسې بايد داسې ونه کړئ، بلکې په تاسې کې چې څوک غواړي د لوړې مرتبې خاوند شي، نو بايد د نورو خدمتګار شي. څوک چې غواړي لومړی مقام ولري، نو بايد د نورو غلام شي، لکه څرنګه چې زه د بني آدمو سردار د دې لپاره دنيا ته نه يم راغلی، چې خلک مې خدمت وکړي، بلکې د دې لپاره راغلی يم، چې نورو ته خدمت وکړم او د ډېرو خلکو د خلاصون لپاره ځان قربان کړم.