د ﷲ ﷻ په سلطنت کې شاملېدل ډېر سخت دي

يو چا له عيسی ﵇ څخه پوښتنه وکړه: ای مولا! آيا يوازې لږ خلک به په آخرت کې له هلاکته نجات پيدا کړي؟

عيسی ﵇ وفرمايل: د ﷲ ﷻ سلطنت د يوې کلا په څېر دی، چې يوه کوچنۍ او تنګه دروازه لري. تاسې تلاش وکړئ چې په دې تنګه دروازه ورننوزئ. په حقيقت کې ډېر خلک به تر وروستي حده کوښښ وکړي چې په دې دروازه ننوزي، خو ناکام به شي. د کور مالک به راپورته شي او ستاسې پر مخ به دروازه وتړي او تاسې به دباندې پاتې شئ، دروازه به ټکوئ او نارې به وهئ، چې ای مالکه! دروازه خلاصه کړئ! خو د کور مالک به درته ووايي، چې زه مو نه پېژنم چې تاسې څوک ياست او له کوم ځايه راغلي ياست. هغه وخت به تاسې وواياست، موږ به له تاسې سره خوراک او څښاک کاوه او تاسې به زموږ په لارو او کوڅو کې الهي درسونه ورکول. خو د کور مالک به بيا هم درته ووايي، چې زه مو نه پېژنم چې تاسې څوک ياست او له کوم ځايه راغلي ياست. له مخې مې لرې شئ! کله چې تاسې ابراهيم، اسحاق، يعقوب ﵇ او ټول انبيا کرام ووينئ چې د ﷲ ﷻ په سلطنت کې برخه لري، خو تاسې دباندې غورځول کېږئ، نو هغه وخت به تاسې وژاړئ او غاښونه به وچيچئ. له تاسې پرته به ډېر خلک له شمال، جنوب، شرق او غرب څخه راشي او د الهي سلطنت په مېلمستيا کې به برخه واخلي. هغه خلک چې اوس ټيټه درجه لري، هغوی به په آخرت کې لوړه درجه ولري او هغه خلک چې اوس لوړه درجه لري، هغوی به په آخرت کې ټيټه درجه ولري.