له حرص څخه ځان وساتئ
د خلکو له منځ څخه يو سړي ناره کړه، ای استاده، تاسې زما ورور ته وواياست چې د پلار له ميراث څخه زما برخه راکړي!
عيسی ﵇ وفرمايل: سړيه! زه چا پر تاسې قاضي مقرر کړی يم، چې تر منځ مو فيصله وکړم؟
بيا عيسی ﵇ خلکو ته وفرمايل: پام کوئ، ځان له هر ډول حرصه وساتئ، ځکه چې د انسان د ژوند هست و نيست د مال او دارايۍ په ډېروالي نه دي.
بيا عيسی ﵇ يو مثال راووړ او ويې فرمايل: يو شتمن سړی و، چې پټي يې ډېر ښه حاصل ورکړ. له ځان سره په فکر کې شو چې زه څه وکړم؟ له ما سره دومره ځای نشته چې دا ټول حاصلات پکې ذخيره کړم. بيا يې وويل: زه به داسې وکړم، چې خپل زاړه ګدامونه به ونړوم او پر ځای به يې لوی – لوی ګدامونه جوړ کړم او دا ټول غله جات او خپل نور مالونه به پکې ذخيره کړم. بيا به له ځان سره ووايم، چې په ګدام کې ډېر مال جمع شوی دی، چې تر ډېرو کلونو به زما اړتياوې راپوره کوي. اوس آرام کوه! خوره، څښه او مزې کوه!
خو ﷲ ﷻ دې سړي ته وفرمايل: ای ناپوه! همدا نن شپه به ستا روح درڅخه واخيستل شي. څه چې دې جمع کړي دي، هغه به چا ته پاتې شي؟
بيا عيسی ﵇ زياته کړه: دغه سرنوشت د هغه چا په نصيب کېږي، چې ځان ته مال ټولوي، خو د ﷲ ﷻ په وړاندې تش لاسی دی.
بيا عيسی ﵇ خپلو پيروانو ته وفرمايل: نو په دې خاطر زه تاسې ته وايم، د خپل ځان اندېښنه مه کوئ، چې موږ به خوراک، څښاک او د اغوستلو لپاره کالي له کومه کوو؟ د انسان ژوند له خوراکه او بدن له جامو ډېر مهم دی. تاسې کارغانو ته وګورئ! دوی نه څه کري او نه څه رېبي او نه هم کومه ذخيره لري، چې خپل خواړه پکې وساتي، خو بيا هم ﷲ ﷻ هغوی ته رزق ورکوي. چېرې کارغان او چېرې انسانان! تاسې د خدای ﷻ په وړاندې له مرغانو څخه خورا ډېر ارزښت لرئ. آيا په تاسې کې کوم څوک شته، چې په اندېښنې کولو سره خپل عمر ته يوه شېبه هم زياته کړای شي؟ که تاسې دومره کوچنی کار هم نه شئ کولای، نو د نورو شيانو لپاره ولې اندېښنه کوئ؟
د رېدي ګلانو ته وګورئ، چې څنګه ښه غوړېږي، خو نه کار کوي او نه ځان ته کالي جوړوي. زه تاسې ته وايم، چې د سليمان ﵇ لباس له خپل ټول شان او شوکت سره – سره د دې ګلانو په څېر ښايست نه درلود. که خدای ﷻ دغه ګلان، چې يوه ورځ شنه وي او بله ورځ تناره ته اچول کېږي، په ښايست پټوي، نو څنګه به تاسې په کاليو نه پټوي؟ ولې مو ايمان دومره کمزوری دی؟ تاسې په دې هڅه کې مه اوسئ، چې موږ ته به خوراک او څښاک له کومه راشي؟ دغو شيانو ته هېڅ تشويش مه کوئ، ځکه د دنيا ټول بې ايمانه خلک په دې شيانو پسې ګرځي، خو ستاسې پروردګار ستاسې په ضرورتونو خبر دی. يوازې په الهي سلطنت پسې هڅه کوئ او ﷲ ﷻ به دا ټول ضرورتونه درپوره کړي.
ای زما د پيروانو وړې ډلې! تاسې مه وېرېږئ، ځکه چې ستاسې د پروردګار خوښه ده چې الهي سلطنت درپه نصيب کړي. تاسې خپل مال او دولت خرڅ کړئ او پيسې يې پر مسکينانو خيرات کړئ. د خپلو ځانونو لپاره داسې دولت ټول کړئ، چې هېڅ وخت ضايع نه شي. يعنې د خپلو ځانونو لپاره په جنت کې يوه داسې دايمي او له منځه نه تلونکې خزانه جوړه کړئ، چېرته چې نه غل ورځي او نه يې حشرات خوري. ځکه په هر ځای کې چې ستاسې خزانه وي، نو هلته به مو زړه هم وي.