عيسی ﵇ پر ديني مشرانو افسوس کوي

کله چې عيسی ﵇ خپلې خبرې خلاصې کړې، د افريسي فرقې يو سړي ده ﵇ ته د ډوډۍ بلنه ورکړه. عيسی ﵇ هم د هغه کور ته تشريف يووړ او دسترخوان ته کېناست. افريسي چې دا وليدل، ډېر حيران شو، چې ده زموږ د دود پر خلاف له ډوډۍ خوړلو مخکې لاسونه نه دي پرېمينځلي. مولا عيسی ﵇ ورته وفرمايل: تاسې افريسيان داسې ياست، لکه يو څوک چې د پيالې يا لوښي دباندې خوا پرېمينځي، خو منځ يې نه پرېمينځي. همدارنګه تاسې خپل ظاهر پرېمينځئ، خو باطن مو له حرص او شرارت څخه ډک دی! ناپوه خلکو! چا چې ستاسې ظاهر جوړ کړی دی، آيا باطن يې نه دی جوړ کړی؟ نو تاسې له خپل مال څخه مسکينانو ته خيرات ورکړئ، بيا به په پوره ډول پاک شئ.

افسوس پر تاسې افريسيانو! تر دې حده د شريعت پابند ياست، چې حتی د ويلني، سپېلنيو او د باغچې د ټولو بوټو لسمه برخه هم د ﷲ ﷻ په لاره کې ورکوئ، مګر د ﷲ ﷻ محبت او انصاف مو له پامه غورځولی دی. لسمه برخه خو تاسې بايد ورکړې وای، خو تر څنګ به مو د ﷲ ﷻ محبت او انصاف هم له پامه نه غورځاوه.

افسوس پر تاسې افريسيانو! دا مو څومره خوښېږي، چې په عبادتخانو کې د عزت په ځای کې کېنئ او په بازارونو کې خلک درسره په درناوي روغبړ وکړي. افسوس دې وي درباندې! تاسې د هغو بې نښانه قبرونو په څېر ياست، چې خلک په بې خبرۍ سره پرې تېرېږي او دوی د موسوي شریعت له مخې ناپاک بلل کېږي. *

د موسوي شريعت يو عالم عيسی ﵇ ته وويل: ای استاده! تا خو په دې خبرو سره موږ هم سپک کړو!

عيسی ﵇ وفرمايل: ای د موسوي شريعت عالمانو! ستاسې پر حال دې هم افسوس وي! تاسې د ديني مسووليتونو درانه بارونه د خلکو پر اوږو ږدئ، خو د خلکو د مرستې لپاره حتی يوه ګوته هم نه پورته کوئ.

افسوس دې وي درباندې! تاسې د هغو پيغمبرانو څلي جوړوئ، کوم چې ستاسې پلرونو او نيکونو شهيدان کړي دي. په دې کار سره تاسې شاهدان ياست او د خپلو پلرونو او نيکونو کارونه تاييدوئ، ځکه چې هغوی د پيغمبرانو قتلونه کړي وو او تاسې يې څلې جوړوئ. د حکمت خاوند ﷻ فرمايلي وو، چې «زه به خلکو ته پيغمبران او استازي ولېږم او خلک به له هغوی څخه ځينې کسان وځوروي او ځينې به يې مړه کړي.» نتيجه يې دا چې د نړۍ له پيدايښت څخه تر ننه به د ټولو شهيد شوو پيغمبرانو خون، د دې زمانې د خلکو پر غاړه وي. افسوس پر تاسې د موسوي شريعت عالمانو! تاسې د علم کيلۍ ته د خلکو د لاسرسۍ مخه نيولې ده. نه تاسې خپله په دروازه داخلېږئ او نه نور خلک پرېږدئ، چې داخل شي.

عيسی ﵇ له هغه ځايه ولاړ او له هغې ورځې وروسته د موسوي شريعت عالمانو او افريسيانو د ده ﵇ سخت مخالفت شروع کړ او د ډېرو موضوعاتو په باره کې به يې پوښتنې ځينې کولې. له دې پوښتنو يې هدف دا و، چې د عيسی ﵇ له خولې داسې يوه خبره راوباسي، چې پر خلاف یې استعمال کړي.

* د موسوي شريعت له مخې چې يو کس به له مړي او یا قبر سره په تماس کې شو، نو اووه ورځې به ناپاک بلل کېده.