يو شتمن سړی له عيسی ﵇ څخه انکار کوي
يوه خان سړي له عيسی ﵇ څخه پوښتنه وکړه: ای کامل استاده! زه داسې کوم عملونه وکړم، چې د نېکمرغۍ ابدي ژوند تر لاسه کړم؟
عيسی ﵇ وفرمايل: ته مې ولې کامل بولې؟ بې له ﷲ ﷻ څخه بل هېڅوک کامل نه دی. ته خو د تورات په احکامو ښه خبر يې، چې ﷲ ﷻ فرمايلي: «زنا مه کوئ، قتل مه کوئ، غلا مه کوئ، د درواغو شاهدي مه ورکوئ او د مور او پلار احترام کوئ!»
خان سړي وويل: ما خو دغه ټول احکام له کوچنيوالي څخه پر ځای کړي دي.
عيسی ﵇ چې د دغه سړي ځواب واورېد، نو ويې فرمايل: يو کار درڅخه لا پاتې دی. ته خپل ټول مال او دارايي خرڅه کړه او پيسې يې پر مسکينانو ووېشه. بيا به په آخرت کې له نعمتونو څخه برخمن يې. له دې وروسته راشه او زما پيروي وکړه.
د دې خبرې په اورېدو سره دغه سړی ډېر مايوسه شو، ځکه چې د خورا ډېر مال او دولت خاوند و. عيسی ﵇ چې د سړي مايوسي وليدله، نو خلکو ته يې وفرمايل: د ﷲ ﷻ په سلطنت کې د شتمنو خلکو داخلېدل څومره ستونزمن دي! هو! په الهي سلطنت کې د يو شتمن کس له داخلېدو څخه دا آسانه ده چې يو اوښ دې د ستنې له سوري تېر شي.
د دې خبرې په اورېدو سره خلکو پوښتنه وکړه: که خبره داسې وي، څوک نجات پيدا کولای شي؟
عيسی ﵇ وفرمايل: د انسان لپاره ناممکنه ده چې په خپل توان سره دې نجات پيدا کړي، مګر د ﷲ ﷻ په واسطه امکان لري.
بيا صفوان وويل: استاده، وګورئ، موږ خو خپل هر څه ستاسې په خاطر پرې ايښي دي او پيروان شوي مو يو.
عيسی ﵇ وفرمايل: زه حقيقت درته وايم، هر چا چې د الهي سلطنت په خاطر کور، ښځه، وروڼه، مور او پلار او يا اولادونه پرې ايښي وي، څو برابره به يې په دې دنيا کې عوض ورکړل شي او په آخرت کې به د نېکمرغۍ ابدي ژوند ورپه برخه شي.