له خپل ورور سره مينه وکړئ
يوه ورځ عيسی ﵇ خلکو ته درس ورکاوه چې د موسوي شريعت يو عالم ودرېد او له عيسی ﵇ څخه يې د ازمايښت لپاره پوښتنه وکړه: استاده! زه داسې څه عمل وکړم، تر څو د نېکمرغۍ ابدي ژوند تر لاسه کړم؟
عيسی ﵇ وفرمايل: په تورات شريف کې په دې اړه څه ليکل شوي دي؟ او ته له هغه څخه څه مطلب اخلې؟
عالم وويل: ليکل شوي چې «له خپل رب ﷲ ﷻ سره په ټول زړه، په ټول وجود، په ټول طاقت او په ټول عقل سره مينه وکړئ» او «له خپل ورور سره داسې مينه کوئ، لکه له خپل ځان سره چې يې کوئ.»
عيسی ﵇ وفرمايل: سم ځواب دې راکړ. ته هم همداسې کوه او ابدي ژوند به تر لاسه کړې.
مګر هغه عالم، د دې لپاره چې ځان حق په جانب وښيي، له عيسی ﵇ څخه بيا پوښتنه وکړه، چې دا خو سمه ده، مګر له وروره هدف څوک دی؟
عيسی ﵇ يو مثال راووړ او ويې فرمايل: زموږ د بني اسراييلو د قوم يو سړی له يروشلمه اريحا ښار ته روان و. په لاره کې د غلو په لاس کې ولوېد. هغوی هر څه ځينې واخيستل، ډېر يې وواهه او نيم ژواندی يې د لارې پر څنډه پرېښود او ولاړل. د بني اسراييلو يو امام تصادفاً پر دې لارې تېرېده.کله چې يې زخمي سړی وليد، د لارې بلې خوا ته واووښت او ترې تېر شو. لږ وخت وروسته د بيت المقدس يو خدمتګار پر دې لاره راغی، خو کله چې يې ټپي سړی وليد، ترې ګوښه شو او په خپله مخه ولاړ. په دې وخت کې د سامريانو د قبيلې يو سړی راغی. په داسې حال کې چې د بني اسراييلو او سامريانو تر منځ پخوانۍ دښمني ده، خو کله چې دې کس هغه ټپي سړی وليد، زړه يې پرې وسوځېد. خوا ته يې ورغی، ټپونه يې په ميو ورپرېمينځل، د زيتونو په تېلو يې غوړ کړل او پټۍ يې پرې ولګولې. بيا يې د خپلې سپرلۍ پر حيوان سپور کړ او يوې مسافرخانې ته يې ورساوه او ښه پالنه يې وکړه. په سبا يې د مسافرخانې مالک ته دوه ديناره ورکړل او ورته ويې ويل: ته د دې سړي پالنه وکړه. که له دې زيات مصرف دې پرې وشو، نو کله چې بېرته راغلم، دربه يې کړم.
عيسی ﵇ له هغه عالم څخه پوښتنه وکړه: اوس ووايه! له هغو درېيو کسانو څخه کوم يوه ته د هغه زخمي شوي سړي ورور ويلای شو؟
عالم وويل: چا چې پر هغه رحم او زړه سوی وکړ.
عيسی ﵇ وفرمايل: ولاړ شه! ته هم هماغسې وکړه.