عيسی ﵇ د هجرت د اختر د لمانځنې په جريان کې درس ورکوي

څه موده وروسته، د بني اسراييلو د هجرت اختر رانږدې شو. عيسی ﵇ پوهېد، چې په يروشلم کې د بني اسراييلو مشران د ده وژل غواړي. نو دی ﵇ د اختر د لمانځنې لپاره ولاړ، خو د خلکو له نظره پټ ګرځېد. په يروشلم کې د اختر د لمانځنې په جريان کې بني اسراييلو پوښتنه کوله: عيسی چېرې دی؟ خلکو په خپلو کې د ده ﵇ په باره کې ورو – ورو خبرې کولې. ځينو ويل: «ډېر ښه سړی دی.» خو نورو ويل: «نه! خلک ګمراه کوي!» خو د بني اسراييلو د مشرانو له وېرې چا جرات نه کاوه چې په ښکاره د ده ﵇ په باره کې څه ووايي.

د اختر د مراسمو ورځې چې تر نيمايي تېرې شوې، عيسی ﵇ بيت المقدس ته تشريف يووړ او خلکو ته يې الهي درسونه پيل کړل. بني اسراييلي مشران يې درسونو ته حيران وو، چې ده رسمي ديني زده کړې نه دي کړي، نو دا دومره علم يې له کومه کړ؟

عيسی ﵇ ورته وفرمايل: دا تعليمات مې له خپل ځانه نه دي، بلکې د هغه چا له خوا دي چې زه يې رالېږلی يم. هر څوک چې غواړي د ﷲ ﷻ د ارادې پر اساس عمل وکړي، نو هغه ته به معلوم شي چې آيا زما تعليمات له ﷲ ﷻ څخه دي او که زما له خپل ځانه دي؟ څوک چې له ځانه خبرې کوي، هغه د خپل نوم او شان د ځلېدو په تلاش کې وي. خو هغه څوک چې د خپل رالېږونکي د نوم او شان د ځلېدو په تلاش کې وي، د هغه خبرې حق او رښتيا وي، هېڅ چل او فريب پکې نه وي. تاسې ته د موسی ﵇ په واسطه شريعت راغلی دی، مګر يو هم پرې عمل نه کوئ. تاسې ولې غواړئ چې ما ووژنئ؟

خلکو وويل: څوک ستا د وژلو نيت لري؟ تا لکه چې پېری غږوي!

عيسی ﵇ ورته وفرمايل: دا چې د عبادت په ورځ مې يوازې يوه معجزه تر سره کړه، نو تاسې ورته حيران شوئ. خو دا مثال واورئ. په موسوي شريعت کې د نارينه ماشومانو د سنت حکم راغلی دی. (دا حکم اصلاً په موسوي شريعت کې کوم نوی حکم نه و، بلکې د ابراهيم ﵇ له وخته ستاسې نيکونو دغه حکم عملي کړی دی.) که په تاسې کې د چا د زوی اتمه ورځ د عبادت له ورځې سره برابره شوه، نو په هماغه ورځ يې سنتوئ، تر څو د موسوي شريعت حکم پر ځای شي. نو په ما ولې په قهر کېږئ چې د عبادت په ورځ مې سړی روغ کړ؟ د ظاهر پر اساس قضاوت مه کوئ، بلکې په عدل او انصاف سره ريښتينی قضاوت وکړئ.

د يروشلم خلکو چې دا خبرې واورېدلې، يو بل ته يې سره وويل: آيا دا هغه سړی نه دی چې مشران يې وژل غواړي؟ مګر دا دی وګورئ! په عامه فضا کې خبرې کوي او دوی يې په ځواب کې څه نه وايي. داسې خو به نه وي چې دوی په اصل کې پوه شوي دي چې دی وعده کړل شوی المسيح دی؟ دا خو امکان نه لري، ځکه موږ ته معلومه ده، چې دی د کوم ځای دی، خو المسيح چې راشي، هېڅوک به نه پوهېږي چې د کوم ځای به وي.

عيسی ﵇ چې په حرم شريف کې درس ورکاوه، په لوړ آواز يې وفرمايل: تاسې ما پېژنئ او درته معلومه ده چې د کوم ځای يم. زه له ځانه نه يم راغلی، بلکې زما رالېږونکی حق دی او تاسې يې نه پېژنئ. زه يې پېژنم، ځکه چې د خدای ﷻ له خوا يم او زه يې رالېږلی يم.

له دې مخالفتونو سره – سره زيات شمېر خلکو پر عيسی ﵇ ايمان راووړ او ويل يې: که دغه سړی د ﷲ ﷻ لخوا وعده کړل شوی المسيح نه وي، نو آيا بل څوک شته چې له ده څخه زياتې معجزې موږ ته راوښيي؟

افريسيانو چې د خلکو دا ورو – ورو خبرې واورېدې، د لويو امامانو په مشوره يې څو ساتونکي واستول چې عيسی ﵇ ګرفتار کړي. په دې وخت کې عيسی ﵇ وفرمايل: يو څه موده نور له تاسې سره يم او بيا خپل رالېږونکي ته بېرته ورځم. هغه وخت به تاسې ما ولټوئ، خو پيدا به مې نه کړئ. هغه ځای ته چې زه ورروان يم، تاسې نه شئ تلای.

بني اسراييلي مشرانو په حيرانتيا له يو بل سره وويل: دی به کوم ځای ته ځي چې موږ يې هلته نه شو پيدا کولای؟ آيا دی زموږ هغو بني اسراييلي وروڼو ته ورځي چې په غير بني اسراييلي سيمو کې تيت او پرک شوي دي؟ آيا غواړي چې هلته پرديو قومونو ته درسونه ورکړي؟ ده چې وويل: «هغه وخت به تاسې ما ولټوئ، خو پيدا به مې نه کړئ. هغه ځای ته چې زه ورروان يم، هلته تاسې نه شئ تلای» مطلب يې څه و؟

د اختر په وروستۍ ورځ، چې د مراسمو تر ټولو لويه ورځ وه، عيسی ﵇ راولاړ شو او خلکو ته يې په لوړ غږ وفرمايل: که څوک تږی وي، ما ته دې راشي او څښاک دې وکړي. هر څوک چې پر ما ايمان راوړي، په کلام ﷲ کې راغلي دي چې «د هغه په زړه کې به د ژوند بخښونکو اوبو سيندونه راوبهېږي.» (له ژوند بخښونکو اوبو څخه يې مقصد د ﷲ ﷻ سپېڅلی روح و، چې لږ وخت وروسته پر هغو کسانو باندې نازلېدونکی و، چې پر ده ﵇ يې ايمان راوړی و، خو لا تر اوسه پورې پرې نه و نازل شوی، ځکه چې عيسی ﵇ لا د شان او شوکت مقام ته نه و پورته کړل شوی.)

د دې خبرو په اورېدو سره ځينو خلکو وويل: «دی په رښتيا هغه نبي دی چې موسی ﵇ يې په اړه وړاندوينه کړې ده.» نورو ويل: «دی وعده کړل شوی استازی المسيح دی.» خو ځينو نورو ويل: «نه! امکان نه لري چې المسيح دې د ګليل وي. په کلام ﷲ کې راغلي دي چې المسيح به د داود ﵇ له اولادې څخه وي او د داود ﵇ په ښار کې يعنې په بيت لحم کې به پيدا شي.»

لنډه دا چې په خلکو کې د ده ﵇ په اړه اختلافات پيدا شول. ځينو کسانو غوښتل چې دی ﵇ ګرفتار کړي، خو چا لاس ورباندې کې نه ښود. ځکه چې د ده ﵇ مقرر وخت لا نه و رارسېدلی.

کله چې هغه لېږل شوي ساتونکي ستانه شول، لويو امامانو او افريسيانو پوښتنه ځينې وکړه: هغه شخص مو ولې رانه وست؟

دوی وويل: هېڅکله مو له يوه انسان څخه داسې ښې خبرې نه وې اورېدلې، لکه له هغه چې مو واورېدلې.

افريسيانو په غصې سره وويل: آيا تاسې يې هم بې لارې کړي ياست؟ په موږ مشرانو کې هېڅوک نشته، چې پر هغه باندې يې ايمان راوړی وي! عام خلک يې پيروي کوي، خو دوی په شريعت نه پوهېږي. دوی لعنت شوي دي!

په دې وخت کې نيکوديماس، هغه افريسي چې مخکې يې له عيسی ﵇ سره ليدلي وو، د ده ﵇ په ملاتړ کې وويل: زموږ شريعت دا اجازه نه راکوي چې پرته له محاکمې يو څوک مجرم وګڼو.

د مجلس نورو مشرانو ورته وويل: آيا ته هم د ګليل يې؟ کلام ﷲ په غور سره وګوره! درته معلومه به شي چې له ګليل څخه د هېڅ نبي د راتګ وړاندوينه نه ده شوې!