د الهي سلطنت د اعلان لپاره د پيروانو تشکيل

له دې وروسته مولا عيسی ﵇ له خپلو پيروانو څخه نور اويا کسان وټاکل او دوه – دوه کسه يې د تبليغ لپاره له ځانه مخکې هغو ښارونو او ځايونو ته ولېږل، چې ده ﵇ يې د ورتګ اراده درلوده. دوی ته يې وفرمايل: فصل زيات دی، خو مزدوران کم دي. نو د دې لپاره د فصل مالک ته دعا وکړئ، چې د خپل فصل رېبلو لپاره مزدوران راولېږي. اوس تاسې ولاړ شئ او په ياد یې وساتئ چې زه مو د وريانو غوندې د لېوانو منځ ته ورلېږم. له ځان سره مه پيسې، مه غوټه او مه اضافي جوړه څپلۍ وړئ. تاسې چې په لاره ځئ، له چا سره په روغبړ کې ځان مه مصروفوئ. کله چې کوم کور ته ننوتئ، نو لومړی د کور پر غړو سلام واچوئ. که په هغه کور کې کوم څوک د سلامتۍ د دې دعا وړ و، نو هغه به سلامتي پيدا کړي. که نه و، نو سلامتي به بېرته تاسې ته راوګرځي. کور په کور مه ګرځئ! په يوه ځای کې پاتې شئ! د کور غړي چې د خوراک او څښاک لپاره څه درته وړاندې کړي، هماغه وخورئ او وڅښئ! ځکه چې مزدور د مزد اخيستلو حق لري. په هر ښار کې چې ستاسې هرکلی وشو، کوربه چې هر شی ستاسې مخې ته کېښود، ويې خورئ! د هغه ځای مريضانو ته شفا ورکړئ او ورته وواياست، چې الهي سلطنت اوس تاسې ته رانږدې شوی دی. خو که کوم ښار ته داخل شوئ او د هغه ځای خلکو ستاسې هرکلی ونه کړ، نو د لارو پر سر اعلان وکړئ چې «زموږ پر پښو چې ستاسې د ښار کومې خاورې رالوېدلې دي، هغه درته څنډو. تاسې پوه شئ او کار مو! خو دا خبره په ياد وساتئ چې الهي سلطنت تاسې ته رانږدې شوی دی.»

څه موده وروسته هغه اويا پيروان په ډېرې خوشحالۍ سره له سفره راستانه شول او عيسی ﵇ ته يې وويل: مولا! موږ چې ستاسې نوم ياد کړو، حتی پېريان هم زموږ اطاعت کوي!

عيسی ﵇ وفرمايل: بلې، زه شاهد وم، چې شيطان د برښنا په څېر تېز له آسمانه راوغورځېد. وګورئ! ما تاسې ته دا اختيار درکړی دی، چې ماران او لړمان تر پښو لاندې کړئ او د شيطان پر ټولو ځواکونو برلاسي شئ او هېڅ شی به تاسې ته هېڅ ډول ضرر ونه رسوي. بيا هم په دې مه خوشحالېږئ، چې پېريان مو تابع دي، بلکې په دې خوشحاله شئ، چې ستاسې نومونه د جنتيانو په قطار کې ثبت شوي دي.