عيسی ﵇ له موسی ﵇ او الياس ﵇ سره ملاقات کوي

تر دې شپږ ورځې وروسته عيسی ﵇ صفوان، يعقوب او د يعقوب ورور يوحَنا له ځان سره يوه لوړ غره ته بوتلل، تر څو له هغوی سره په خلوت کې واوسي. هلته درې واړو اصحابو وکتل، چې ناڅاپه د عيسی ﵇ ظاهري بڼه بدله شوه. پر مبارک مخ يې الهي نور د لمر په څېر ځلېده او جامې يې د رڼا غوندې سپينې شوې. ناڅاپه موسی او الياس نبي ورته راښکاره شول او له هغه ﵇ سره په خبرو اترو بوخت شول. په دې وخت کې صفوان عيسی ﵇ ته وويل: مولا! څومره ښه ده چې موږ دلته يو! که تاسې غواړئ، نو زه به دلته تاسې درې واړو ته سرپناوې جوړې کړم، يوه ستاسې، يوه د موسی ﵇ او يوه د الياس ﵇ لپاره.

ده لا خپلې خبرې نه وې خلاصې کړې، چې يوه نوراني ورېځ راغله او دوی يې پټ کړل. بيا له ورېځې څخه یو غږ راغی او داسې يې وويل: دا زما ګران او خاص نازولی دی، چې زه ترې په پوره ډول راضي يم. تاسې د ده اطاعت وکړئ!

د دې غږ په اورېدو سره درې واړه نږدې اصحاب سخت ووېرېدل او پر ځمکه پړمخې پرېوتل. عيسی ﵇ راغی، لاس يې ورباندې راکش کړ او ويې فرمايل: راولاړ شئ! مه وېرېږئ.

کله چې دوی درې واړو سترګې پورته کړې، ګوري چې له عيسی ﵇ څخه پرته بل هېڅوک نشته. دوی تر ډېره وخته پورې خپل د سترګو ليدلی حال په زړه کې پټ وساته او چا ته يې ونه وايه.