له عيسی ﵇ څخه افريسيان او صدوقيان الهي نښه غواړي

يوه ورځ د افريسيانو او صدوقيانو له فرقو څخه ځينې پيروان عيسی ﵇ ته راغلل، تر څو امتحان ترې واخلي. له ده ﵇ څخه يې وغوښتل، چې موږ ته يوه الهي نښه راښکاره کړه.

عيسی ﵇ ورته وفرمايل: که د ماښام په وخت کې آسمان سور ښکاري، نو تاسې اندازه لګوئ، چې سبا به هوا ښه وي. همدارنګه که د سهار په وخت کې آسمان سور او وريځ وي، نو تاسې اندازه لګوئ، چې نن به هوا طوفاني وي. تاسې د هوا د نښو اندازه لګولای شئ، خو د دې زمانې د نښو اندازه نه شئ لګولای.

د دې زمانې بدکاره او بې ايمانه خلک الهي نښه غواړي، خو دوی ته به د يونس ﵇ له نښې پرته بله نښه ورونه ښودل شي.

له دې وروسته يې هغه خلک پر هماغه ځای پرېښودل او ولاړ.

وروسته له خپلو اصحابو سره د جهيل هغې بلې غاړې ته پورې ووت. نږدې اصحابو دا هېره کړې وه، چې له ځان سره ډوډۍ يوسي. په دې وخت کې عيسی ﵇ ورته وفرمايل: تاسې د افريسيانو او صدوقيانو له خميرې څخه خبردار اوسئ!

د دې په اورېدو سره نږدې اصحابو له يو بل سره وويل: ده ﵇ دا خبره ځکه کړې ده، چې موږ له ځان سره ډوډۍ نه ده راوړې. عيسی ﵇ د دوی په خبرو پوه و، نو ورته ويې فرمايل: ولې ستاسې ايمان دومره کمزوری دی؟ د ډوډۍ د نه راوړلو پر سر ولې له يو او بل سره جنجال کوئ؟ آيا تر اوسه پورې نه ياست پوه شوي؟ آيا هغه ورځ مو نه ده په ياد، چې ما له پنځو ډوډيو څخه پنځه زره کسان ماړه کړل او بيا تاسې له پاتې شوو خوراکي توکو څخه څو دانې ټوکرۍ هم ډکې کړې؟ نو ما چې درته وويل: «تاسې د افريسيانو او صدوقيانو له خميرې څخه خبردار اوسئ!» تاسې ولې پوه نه شوئ، چې مقصد مې له ډوډۍ څخه نه و؟

هغه وخت نږدې اصحاب پوه شول، چې د عيسی ﵇ مقصد هغه خميره نه ده، چې د ډوډۍ لپاره وي، بلکې مقصد يې د افريسيانو او صدوقيانو د فرقو تعليمات دي.