ژوند بخښونکی خوراک

په دا بله ورځ د طبريې له ښار څخه يو څو کښتۍ د جهيل بلې غاړې ته راورسېدې، چېرې چې مخکې عيسی ﵇ له ﷲ ﷻ څخه شکر ادا کړی و او خلکو ډوډۍ خوړلې وه. کوم خلک چې هلته ولاړ وو، هغوی ته اندازه وشوه چې پرون دلته يوازې يوه کښتۍ موجوده وه او هغه هم نږدې اصحابو بېولې ده، خو عيسی ﵇ ورسره په کښتۍ کې نه و سپور شوی. خلکو وليدل چې دلته نه عيسی ﵇ شته او نه د هغه اصحاب، نو دغو نوو راغليو کښتيو ته وروختل او د هغه ﵇ په تلاش کې د کَفرناحوم خوا ته روان شول. بلې غاړې ته چې ورسېدل، عيسی ﵇ يې پيدا کړ او ورته ويې ويل: استاده! تاسې دلته کله راغلاست؟

عيسی ﵇ وفرمايل: زه حقيقت درته وايم، چې تاسې په دې خاطر زما په تلاش کې نه ياست راغلي، چې زما معجزې مو درک کړي دي، بلکې په دې خاطر چې تاسې په ډوډۍ ماړه شوئ. تاسې بايد د هغو خوراکي توکيو په تلاش کې ونه اوسئ، چې له منځه تلونکي وي، بلکې په هغه خوراک پسې وګرځئ، چې په خوړلو يې تاسې د نېکمرغۍ ابدي ژوند تر لاسه کوئ او هغه خوراک زه د بني آدمو سردار تاسې ته دربخښم، ځکه چې زما پروردګار پر ما باندې د تصديق مهر لګولی دی.

خلکو ورته وويل: موږ هم غواړو داسې کارونه تر سره کړو، چې ﷲ ﷻ پرې راضي شي، نو تاسې راته وواياست چې موږ څه وکړو؟

عيسی ﵇ ورته وفرمايل: خدای ﷻ په دې راضي کېږي، چې تاسې پر هغه چا ايمان راوړئ، چې خدای ﷻ رالېږلی دی.

خلکو وويل: نو موږ ته يوه معجزه راوښياست، تر څو د هغې په ليدلو زموږ يقين درباندې وشي. تاسې به څه راته وښياست؟ د موسی ﵇ په معجزې خو به خبر ياست! کله چې زموږ پلرونه او نيکونه په بيابان کې لالهانده ګرځېدل، دوی «منّ» خوړل. د دې پېښې يادونه په کلام ﷲ کې راغلې ده، چې فرمايي: «دوی ته يې له آسمانه خوراک ورکړ.»

عيسی ﵇ وفرمايل: زه تاسې ته حقيقت وايم، چې دغه له آسمانه رالېږل شوی خوراک ستاسې پلرونو ته موسی ﵇ نه و ورکړی، بلکې زما پروردګار ورکړی و او اوس تاسې ته حقيقي خوراک وړاندې کوي. حقيقي خوراک هغه دی چې له آسمانه ځمکې ته راغلی دی او د نړۍ خلکو ته د نېکمرغۍ ابدي ژوند ورپه برخه کوي.

خلکو وويل: ښاغليه! موږ ته تل دغه خوراک راکړه!

عيسی ﵇ ورته وفرمايل: له ژوند بخښوونکي خوراک څخه مقصد زه يم! هر څوک چې ما ته راشي، هېڅکله به بيا وږی نه شي. هر څوک چې پر ما ايمان راوړي، هېڅکله به بيا تږی نه شي، خو لکه څنګه چې مې درته وويل، تاسې سره له دې چې زه مو ليدلی يم، خو پر ما باندې ايمان نه راوړئ. خو هر هغه څوک چې پروردګار ﷻ ما ته عطا کړی دی، ما ته به راشي او دوی به په هېڅ وجه له ځانه ونه رټم. زه له آسمانه دې دنيا ته د دې لپاره نه يم راغلی، چې خپله اراده پوره کړم، بلکې د هغه چا اراده پوره کوم چې زه يې رالېږلی يم. د خدای ﷻ اراده دا ده چې زه له هغو خلکو څخه يو هم له لاسه ور نه کړم، چې د خدای ﷻ لخوا ما ته عطا شوي دي، بلکې د قيامت په ورځ به يې د نېکمرغۍ ابدي ژوند ته راپورته کړم. زما د پروردګار رضا دا ده چې هر هغه څوک چې د خدای ﷻ خاص نازولي په ديدار مشرف شي او ايمان پرې راوړي، نو د نېکمرغۍ د ابدي ژوند خاوند به شي او زه به يې د قيامت په ورځ دې ژوند ته راپورته کړم.