عيسی ﵇ تر پنځه زرو زياتو کسانو ته په معجزيي توګه خواړه ورکوي
نږدې اصحاب چې د الهي سلطنت د اعلان له سفر څخه بېرته راغلل، عيسی ﵇ ته يې د خپل سفر کيسه وکړه، چې دوی څه کړي دي او خلکو ته يې څه درسونه ورکړي دي. هلته د عيسی ﵇ ليدو ته ډېرو خلکو تګ راتګ کاوه، تر دې چې دوی دا فرصت هم نه درلود چې ډوډۍ وخوري. نو عيسی ﵇ نږدې اصحابو ته وفرمايل: راځئ يو ګوښه ځای ته ولاړ شو چې هلته لږ آرام وکړو.
دوی هم په کښتۍ کې د يو ګوښه ځای په طرف حرکت وکړ، خو ډېرو خلکو دوی د تګ په حالت کې وليدل او اندازه يې ولګوله چې دوی کومې خوا ته روان دي. نو د ډېرو ښارونو خلکو په منډه – منډه د وچې له لارې هماغه ځای ته ځانونه ورسول. کله چې عيسی ﵇ له کښتۍ څخه وچې ته راښکته شو، دا زيات شمېر راټول شوي خلک يې وليدل او زړه يې ډېر پرې وسوځېد، ځکه چې دوی ورته لکه بې شپونه رمه ښکاره شو. بيا يې ورته د ډېرو شيانو په اړه درسونه شروع کړل.
نږدې ماښام و، چې نږدې اصحاب عيسی ﵇ ته راغلل او عرض يې ورته وکړ، چې موږ خو په دښته کې يو او ورځ په خلاصېدو ده. دا خلک رخصت کړئ، چې شاوخوا کلو او بانډو ته ولاړ شي، تر څو ځانونو ته ډوډۍ واخلي.
عيسی ﵇ وفرمايل: نه! ډوډۍ بايد تاسې ورکړئ!
اصحابو وويل: د دې ټولو خلکو د خوراک اخيستلو لپاره دوه سوه ديناره په کار دي. نو دومره ډېرې پيسې له کومه کړو؟
عيسی ﵇ په ځواب کې وفرمايل: تاسې ولاړ شئ او وګورئ، چې له تاسې سره څو ډوډۍ دي؟
اصحابو هم هماغسې وکړل، راغلل او ويې ويل: له موږ سره پنځه ډوډۍ او دوه ماهيان دي.
عيسی ﵇ وفرمايل: خلک پر چمن باندې ډلې ډلې کېنوئ. خلک هم پنځوس – پنځوس يا سل – سل کسه کېنستل. بيا عيسی ﵇ هغه پنځه ډوډۍ او دوه ماهيان راواخيستل، آسمان ته يې وکتل او د برکت دعا يې وکړه. ډوډۍ يې ټوټې – ټوټې کړې او نږدې اصحابو ته يې ورکړې، تر څو يې پر خلکو ووېشي. د ماهيانو غوښه يې هم پر خلکو ووېشله.
ټولو خلکو په ماړه نس خواړه وخوړل او نږدې اصحابو له پاتې ډوډيو او غوښې څخه دوولس ټوکرۍ هم ډکې کړې. د دې ډوډۍ په خوړلو کې پنځه زره سړي شامل وو.
خلکو چې دغه معجزه وليدله، له يو بل سره یې وويل: يقيناً دغه سړی هغه پيغمبر دی چې موږ يې دنيا ته د راتلو په تمه وو!
عيسی ﵇ ته اندازه وشوه، چې خلک غواړي دی په زوره بوزي او خپل پاچا يې کړي. نو يو ځل بيا له خلکو څخه ګوښه شو او غره ته يوازې ولاړ.