عيسی ﵇ يوه سړي ته له پېريانو خلاصون ورکوي
له دې وروسته عيسی ﵇ او نږدې اصحاب يې د جِرَش سيمې ته ورسېدل، چې د ګليل جهيل پر هغه بله غاړه پرته وه. کله چې عيسی ﵇ له کښتۍ څخه ښکته شو، نو يو پېريانی سړی يې مخې ته راغی. ياد سړی اصلاً له ښار څخه و، خو له ډېرې مودې راهيسې بې کوره او لوڅ لغړ په يوه هديره کې اوسېد. ډېر واره داسې پېښ شوي وو، چې دا سړی به پېريانو ونيو. نو خلکو به يې پښې او لاسونه په ځنځيرونو وتړل او تر څار لاندې به يې ونيو، خو هغه به ځنځيرونه وشکول او د پيريانو په زور به بيابان ته ولاړ. عيسی ﵇ دې شيطاني پېري ته امر وکړ، چې دا سړی خوشې کړه!
د دې امر په اورېدو سره سړی په چيغو شو. د عيسی ﵇ پښو ته يې ځان وروغورځاوه او په لوړ آواز يې وويل: ای عيسی، د متعال خدای خاص نازوليه! موږ او ستا له يو بل سره څه؟ له تا څخه هيله کوم، چې ما ته عذاب مه راکوه!
عيسی ﵇ ترې وپوښتل: ستا نوم څه دی؟
هغه وويل: لښکر! (ځکه چې زيات شمېر پېريان پر هغه سړي ناست وو.)
پېريانو په وار – وار ده ﵇ ته زارۍ وکړې، چې موږ د عذاب کندې ته مه اچوه!
هلته په غره کې د خوګانو يوه غټه رمه څرېده. پېريانو له عيسی ﵇ څخه هيله وکړه، چې موږ ته اجازه راکړه، چې پر دغو خوګانو کېنو!
عيسی ﵇ اجازه ورکړه. ټولو پېريانو هغه سړی خوشې کړ او پر خوګانو کېنستل. خوګان وتورېدل او د غره له څنډې څخه لاندې په جهيل کې ولوېدل او غرق شول.
د خوګانو شپنو چې دا پېښه وليده، نو له هغه ځايه وتښتېدل او د ښار او شاوخوا کلو خلک يې پرې خبر کړل. خلک هم راووتل چې دغه پېښه په خپلو سترګو وويني. کله چې عيسی ﵇ ته راورسېدل، هغه سړی يې وليد، چې مخکې پېريانو نيولی و. د عيسی ﵇ پښو ته ناست دی. جامې يې اغوستې او عقل يې سالم دی. خلکو چې دا حالت وليد، وهم او وېره پرې خپره شوه. د پېښې عيني شاهدانو دوی ته ټوله کيسه وکړه، چې دغه پېرياني سړي څرنګه خلاصون پيدا کړی دی. د جِرَش د شاوخوا سيمو ټول خلک وېرې اخيستي وو، نو په همدې خاطر يې له عيسی ﵇ څخه هيله وکړه، چې تاسې له دې ځای څخه ولاړ شئ!
عيسی هم ﵇ کښتۍ ته وخوت، تر څو بېرته د جهيل هغې بلې غاړې ته ولاړ شي. له پېريانو خلاص شوي سړي له عيسی ﵇ څخه په زاريو اجازه وغوښته، تر څو ورسره ولاړ شي، خو عيسی ﵇ ورته وفرمايل: ته بېرته خپلې کورنۍ ته ولاړ شه او هر هغه څه چې ﷲ ﷻ له تا سره کړي دي، هغوی ته يې بيان کړه.
سړی هم ولاړ او په ټول ښار کې يې خلکو ته ويل، چې زه عيسی ﵇ د پېريانو له منګولو خلاص کړی يم!