خلک له عيسی ﵇ څخه الهي نښه غواړي

له دې وروسته د موسوي شريعت ځينو عالمانو او افريسيانو عيسی ﵇ ته وويل: استاده، موږ له تاسې څخه يوه الهي نښه غواړو، چې راښکاره يې کړئ!

ده ﵇ په ځواب کې وفرمايل: د دې زمانې بدکاره او بې ايمانه خلک الهي نښه غواړي، خو دوی ته به د يونس پيغمبر له نښې پرته بله نښه ورونه ښودل شي. لکه څرنګه چې يونس ﵇ درې شپې او ورځې د غټ ماهي په نس کې و، نو همدارنګه به د بني آدمو سردار هم درې شپې او ورځې د ځمکې په نس کې وي. د نينَوا ښار خلک به د قيامت په ورځ د دې زمانې د خلکو پر خلاف شاهدۍ ته راپورته شي او ملامت به يې کړي، ځکه دوی چې د يونس ﵇ تبليغ واورېد، نو له خپلو بدو کارونو څخه يې لاس واخيست، خو وګورئ اوس دلته له يونس ﵇ څخه د لوړې مرتبې والا حضور لري. د سبا ملکه به هم د قيامت په ورځ د دې زمانې د خلکو پر خلاف شاهدۍ ته راپورته شي او ملامت به يې کړي، ځکه هغې له خپل ملک څخه ډېر لرې سفر وکړ، تر څو د سليمان ﵇ حکيمانه خبرې واوري، خو وګورئ، چې اوس دلته له سليمان ﵇ څخه د لوړې مرتبې والا حضور لري.

بيا عيسی ﵇ وفرمايل: کله چې يو پېری له چا څخه ولاړ شي، نو په سپېرو ځايونو کې وګرځي، تر څو د ځان لپاره يو آرام ځای پيدا کړي، خو کله چې داسې ځای پيدا نه کړي، نو له ځان سره ووايي، چې بېرته به هغه کس ته ورشم، له چا څخه چې زه تللی وم. نو هغه شخص ته راستون شي، وګوري چې دغه کس د هغه کور په څېر دی چې، جارو شوی، منظم او خالي وي او د پېري ورتګ ته آماده وي. نو ولاړ شي، تر ځان اووه بد پېريان له ځان سره ملګري کړي او دا شخص ونيسي او حالت يې تر مخکې لا ډېر خراب کړي. د دې زمانې د خرابکارانو خلکو انجام به همدغسې وي.