شيطاني قوتونو ته د عيسی ﵇ لخوا ماتې ورکول
له دې وروسته خلکو عيسی ﵇ ته يو پېريانی سړی راوست، چې پېريانو ړوند او ګونګی کړی و. عيسی ﵇ ده ته شفا ورکړه، د سړي سترګې بينا او ژبه يې خلاصه شوه. دې حال ته په کتو سره هلته حاضر خلک هک حيران شول او يو له بله يې پوښتنه کوله: آيا امکان لري چې دا شخص د داود ﵇ د تخت وارث، يعنې المسيح وي؟
خو کله چې د افريسي فرقې پيروانو دا خبره واورېدله، ويې ويل: دی پېريان د ابليس لعين په مرسته پورته کوي، ځکه چې جنيات د ابليس تر حکم لاندې دي.
عيسی ﵇، چې د دوی په فکرونو باندې خبر و، وفرمايل: په کوم سلطنت کې چې نفاق پيدا شي، نو هغه سلطنت له منځه ځي او په کوم کور يا ښار کې، چې بې اتفاقي منځ ته راشي، هغه ورانېږي. که چېرې شيطان خپل پيروان په تبر ووهي، نو د ده پاچاهي به څنګه دوام وکړي؟ که چېرې زه پېريان د ابليس په زور پورته کوم، دا وواياست، چې ستاسې مريدان يې د چا په زور پورته کوي؟ نو هغوی به دا ثابته کړي، چې تاسې ملامت ياست. زه چې د ﷲ ﷻ د سپېڅلي روح په مرسته پېريان پورته کوم، نو پوه شئ چې الهي سلطنت ستاسې منځ ته راغلی دی. دا مثال واورئ! هېڅوک د يوه زورور کور ته نه شي داخلېدای او مالونه يې نه شي لوټولای، تر څو لومړی هغه زورور سړی وتړي او قدرت يې ورشنډ کړي. له دې وروسته هر څه چې يې زړه غواړي، لوټولای يې شي.
څوک چې زما په طرف نه وي، هغه مې مخالف دی. همدارنګه څوک چې زما خوا ته د خلکو په راټولولو کې له راسره مرسته نه کوي، هغه خلک د ګمراهۍ پر لور بيايي. نو په دې خاطر زه تاسې ته وايم، چې د انسان هره ژبنيزه او عملي ګناه د بخښلو وړ ده، مګر څوک چې د ﷲ ﷻ د سپېڅلي روح په شان کې سپکاوی وکړي، هېڅکله به ونه بخښل شي. څوک چې د بني آدمو په سردار پسې بد ووايي، نو دا بد يې د بخښلو وړ دي، خو څوک چې د ﷲ ﷻ د سپېڅلي روح په شان کې سپکاوی وکړي، هېڅکله به ونه بخښل شي، نه په دې دنيا کې او نه په آخرت کې.
د ښې مېوې ونه ښه وګڼئ او د خرابې مېوې ونه خرابه وګڼئ، ځکه چې ونه له خپلې مېوې څخه پېژندل کېږي. ای د شيطان بچيانو! تاسې چې خرابکاران ياست، څنګه به يوه ښه خبره وکړئ؟ ځکه، له څه شي چې د انسان زړه ډک وي، هغه يې په خوله راځي. ښه انسان د خپل زړه له ښې خزانې څخه ښه شيان راباسي او بد انسان د زړه له بدې خزانې څخه بد شيان راباسي. زه تاسې ته وايم، چې د قيامت په ورځ به انسان د هرې بې ګټې خبرې حساب ورکړي. تاسې به د خپلو خبرو پر اساس، مقصر او يا بې تقصيره وګڼل شئ.