د يحيی ﵇ شهادت
ياد مو دي، چې د ګليل حاکم هيرود انتيپاس د خپل ورور فيليپ ښځه هيروديه ځان ته واده کړې وه، حال دا چې فيليپ ژوندی و. يحيی ﵇ هيرود ته ويل: دا غير شرعي کار دی، چې ته د خپل ورور ښځه ځان ته ودوې!
د يحيی ﵇ په دغو خبرو باندې هيروديه ډېره په قهر شوه او په زړه کې يې کينه ورته پيدا شوه. نو هيرود د هغې په خاطر عسکر ورواستول، چې يحيی ﵇ ونيسي او په بندي خانه کې يې واچوي. له دې سره – سره بيا هم د هيروديې کينه د يحيی ﵇ پر وړاندې نه کمېدله او داسې موقع يې غوښتله چې يحيی ﵇ مړ کړي، خو دغه موقع په لاس نه ورتله، ځکه چې هيرود له يحيی ﵇ څخه وېرېده. پوهېد چې يحيی ﵇ راستکار او پاک انسان دی او په دې خاطر يې د هغه ﵇ حفاظت کاوه. کله چې به يې د يحيی ﵇ خبرې واورېدې، زړه به يې ناکراره شو، خو بيا هم راضي و، چې وايې وري.
بالاخره داسې ورځ راغله چې د هيروديې ناوړه دسيسه عملي شوه. دغه ورځ د هيرود د زېږېدنې کليزه وه او د خپلو وزيرانو، منصبدارانو او د ګليل سيمې نورو مخورو شخصيتونو لپاره يې يوه مېلمستيا جوړه کړې وه. د دې په جريان کې د هيروديې لور نڅا وکړه. هيرود او نورو مېلمنو ته يې نڅا خوند ورکړ. نو هيرود هغې ته وويل: له ما څخه غوښتنه وکړه، هر څه چې دې زړه غواړي، ستا دي. زما دې قسم وي، هر څه چې غواړې، درکوم يې، حتی زما تر نيمې پاچاهۍ پورې!
نجلۍ خپلې مور ته ورغله او پوښتنه يې ځينې وکړه: د څه شي غوښتنه وکړم؟
مور يې وويل: د يحيی پرې کړی سر ځينې وغواړه!
نجلۍ هم بېرته په بېړې سره هيرود ته راغله او ويې ويل: زه همدا اوس د يحيی سر په يوه پتنوس کې غواړم!
د دې خبرې په اورېدو سره هيرود ډېر خواشينی شو، خو څرنګه چې د ټولو مېلمنو په مخ کې يې قسم کړی و، د نجلۍ غوښتنه يې نه شوای ردولای. نو سمدستي يې جلاد ته امر وکړ، چې د يحيی سر دې ورته راوړي.
جلاد هم بندي خانې ته ولاړ او د يحيی ﵇ سر يې له تنه جلا کړ، په يوه پتنوس کې يې راووړ او نجلۍ ته يې ورکړ. نجلۍ هم خپلې مور ته ورووړ. کله چې د يحيی ﵇ پيروان پر دغو پېښو خبر شول، د هغه ﵇ د جسد د وړلو لپاره راغلل. راوايې خيست او په يوه قبر کې يې ښخ کړ.