د عيسی ﵇ ښځينه پيروانې

له دې وروسته عيسی ﵇ کلي په کلي او ښار په ښار ګرځېد او خلکو ته يې د الهي سلطنت د ظهور زېری ورکاوه. له ده ﵇ سره د دوولسو نږدې اصحابو تر څنګ يو شمېر ښځې هم وې، چې له مرضونو او پېريانو څخه يې خلاصون پيدا کړی و. په دې ښځو کې يوه مريم مجدليه وه، چې عيسی ﵇ اووه پېريان ترې لرې کړي وو. بله يې حنانه وه، چې مېړه يې خوزا د حاکم هيرود انتيپاس منشي و. بله ښځه سوسن نومېده. پر دې ښځو سربېره ډېرې نورې ښځې هم ورسره وې او دغو ټولو به خپل مال او شتمني د عيسی ﵇ او د نږدې اصحابو په خدمت کې مصرفوله.