يحيی ﵇ د عيسی ﵇ د موقف تصديق تر لاسه کوي

بلخوا يحيی ﵇ په بندي خانه کې د عيسی ﵇ له کارونو څخه خبر شو. نو يې خپل يو څو تنه پيروان عيسی ﵇ ته، له دې پوښتنې سره ورولېږل، چې آيا تاسې هماغه وعده کړل شوی المسيح ياست، که موږ د بل چا په تمه پاتې شو؟

عيسی ﵇ دوی ته وفرمايل: تاسې ولاړ شئ او هغه څه چې مو وليدل او واورېدل، يحيی ته يې بيان کړئ، چې ړانده بينا کېږي، شلان ګرځېږي، جلدي مريضان پاکېږي، کاڼه اوري، مړي راژوندي کېږي او بې وزلو ته د خوشحاليو زېري ورکول کېږي. نېکمرغه هغه کس دی، چې پر ما باندې شک ونه کړي.

کله چې د يحيی ﵇ پيروان ولاړل، نو عيسی ﵇ راټول شوو خلکو ته د يحيی ﵇ په اړه وفرمايل: تاسې بيابان ته د څه شي ليدلو ته تللي وئ؟ آيا غوښتل مو چې يو نی وګورئ، چې باد يې آخوا دېخوا ښوروي؟ او که د داسې يوه کس ليدو ته تللي وئ چې شانداره جامې يې اغوستې وې؟ په ياد ولرئ! د ښه او شانداره لباس اغوستونکي په قصرونو کې اوسي. نو بيا تاسې د چا ليدلو لپاره تللي وئ؟ آيا د يوه نبي ليدو ته؟ هو، بلکې زه وايم، چې هغه د لوړې درجې نبي دی، ځکه چې يحيی ﵇ هماغه کس دی، چې په اړه يې په کلام ﷲ کې داسې راغلي دي: «وګورئ! زه خپل نبي له تا څخه مخکې لېږم، چې ستا د راتګ لاره هواره او آماده کړي.»

بيا عيسی ﵇ وفرمايل: زه تاسې ته وايم، چې د آدم په نسل کې له يحيی ﵇ څخه د لوړې درجې خاوند نشته، خو زما هغه پيرو چې په الهي سلطنت کې تر ټولو د ټيټې درجې برخه لرونکی وي، له يحيی ﵇ څخه لوړه درجه لري.

بيا عيسی ﵇ خلکو ته وفرمايل: زه د دې زمانې خلک له څه سره تشبيه کړم او مثال يې څه ډول دی؟ دوی خو د هغو ماشومانو په څېر دي، چې په بازار کې ناست وي او يو بل ته نارې وهي، چې موږ ستاسې لپاره شپېلۍ وغږوله، خو تاسې ونه ګډېدئ. موږ د غم او وير سندره وويله، خو تاسې ونه ژړل. همدارنګه کله چې يحيی ﵇ راغی او په پرهېزګارۍ سره يې له شرابو او کبابو خوړلو څخه ډډه کوله، نو تاسې هغه، يو پېريانی وباله. کله چې زه د بني آدمو سردار راغلم او خوراک او څښاک مې کاوه، تاسې ويل، چې دا سړی خېټور او شرابي دی او له فاسدو محصول اخيستونکو او ګناهکارانو سره ملګرتيا کوي. مګر په ياد ولرئ، چې الهي حکمت د خپلو پيروانو په وسيله رښتينی ثابتېږي.

د دې خبرې په اورېدو سره ټولو خلکو، حتی فاسدو محصول اخيستونکو هم د خدای ﷻ په حقانيت اعتراف وکړ، ځکه چې هغوی پخوا د يحيی ﵇ په لاس سپېڅلې غوټه تر سره کړې وه، مګر د افريسي فرقې پيروانو او د موسوي شريعت عالمانو، چې له يحيی ﵇ څخه يې سپېڅلې غوټه نه وه تر سره کړې، الهي پيغام رد کړ.

هغه وخت عيسی ﵇ د سپېڅلي روح په برکت سره ډېر خوشحاله شو او ويې فرمايل: ای پروردګاره، د آسمان او ځمکې مالکه! زه ستا شکر ادا کوم چې دغه خبرې دې له هوښيارانو او پوهانو څخه پټې کړي او داسې کسانو ته دې څرګندې کړي دي، چې د ماشومانو په څېر پر تا ايمان لري. يا پروردګاره! بې شکه، چې ستا رضا همدا وه!

له دې وروسته عيسی ﵇ خلکو ته وفرمايل: زما پروردګار هر څه زما په اختيار کې راکړي دي. هېڅوک خاص نازولی نه پېژني، پرته له پروردګاره او هېڅوک پروردګار نه پېژني، پرته له خاص نازولي څخه او هغه کسان به يې هم وپېژني، چې خاص نازولی يې څرګندول ورته پېرزو کړي.