د نېکمرغه ابدي ژوند د تګ لاره

عيسی ﵇ وفرمايل: ای زما د پيروانو وړې ډلې! تاسې مه وېرېږئ، ځکه چې ستاسې د پروردګار خوښه ده چې الهي سلطنت درپه نصيب کړي. تاسې له هغې تنګې دروازې څخه داخل شئ، چې د نېکمرغۍ ابدي ژوند ته ځي. هغه لاره چې هلاکت ته ځي، دروازه يې لويه او لاره يې پراخه ده. ډېر خلک پرې داخلېږي. د نېکمرغۍ د ابدي ژوند دروازه ډېره تنګه ده او لاره يې ډېره سخته ده او لږ خلک يې پيدا کوي.

که څوک يوازې ما ته «مولا! مولا!» ووايي، په الهي سلطنت کې برخه نه شي پيدا کولای، بلکې هغه کسان پکې برخه لري، چې زما د عرش د پروردګار له رضا سره سم عمل کوي. د قيامت په ورځ به ډېر کسان راته ووايي: مولا! مولا! موږ ستا په نامه الهام شوي پيغامونه ويل. ستا په نامه مو پيريان پورته کول او ستا په نامه مو ډېر کرامات تر سره کول. هغه وخت به دوی ته په ډاګه ووايم، چې ای نافرمانو خلکو، زه تاسې هېڅ نه پېژنم. لرې شئ له مخې مې!

څوک چې زما خبرې واوري او عمل پرې وکړي، نو د هغه مثال داسې دی، لکه يو عقلمند سړی چې د خپل کور بنياد پر کلک ډبرين ځای باندې جوړ کړي. کله چې پر دغه کور باندې بارانونه او سېلابونه راشي او توند بادونه پرې ولګېږي، نو کور نه نړېږي، ځکه چې د کور بنياد له پيله پر کلک ډبرين ځای ايښودل شوی وي. خو څوک چې زما خبرې واوري او عمل پرې ونه کړي، د هغه مثال داسې دی، لکه يو بې عقل سړی چې خپل کور پر رېګو باندې جوړ کړي. کله چې باران وورېږي، سېلابونه راشي او بادونه والوزي، نو له دې امله يې کور چپه شي او په بشپړه توګه له منځه ولاړ شي.

عيسی ﵇ چې دا خبرې خلاصې کړې، خلک يې درسونو ته حيران پاتې شول، ځکه چې هغه ﵇ د دوی د عالمانو په څېر نه و، چې له نورو روايت وکړي، بلکې په ډېر قدرت سره به يې اغېزناکه وينا کوله.