د ځان ښودنې په اړه د عيسی ﵇ څرګندونې

په خيرات کې رياکاري

خبردار چې نېک عملونه د نورو خلکو په مخ کې د ځان ښودنې لپاره ونه کړئ! که نه، نو ستاسې د عرش د پروردګار له خوا به هېڅ اجر درنه کړل شي. کله چې خيرات کوئ، نو ډنډوره مه جوړوئ! داسې خو رياکاران په عبادتخانو او کوڅو کې کوي، تر څو د خلکو ستاينې تر لاسه کړي. زه تاسې ته حقيقت وايم، چې له دې ستاينو څخه پرته دوی ته نور هېڅ اجر او ګټه نشته. د دې برعکس، کله چې خيرات کوئ، په داسې ډول يې وکړئ، چې په ښي لاس مو کيڼ لاس خبر نه شي. يعنې، خيرات بايد په پټه ورکړل شي. بيا به ستاسې پروردګار، چې هر پټ کار ويني، اجر درکړي.

په روژه کې رياکاري

کله چې روژه نيسئ، نو د رياکارانو په څېر مه اوسئ! دوی شونډې ځړوي او خپل مخونه خراب نيسي، تر څو خلکو ته دا ښکاره کړي، چې زما روژه ده. زه حقيقت درته وايم، چې دوی ته اجر او ګټه بس همدغه ده، چې خلک يې صفت او ستاينه کوي. د دې برعکس، کله چې روژه نيسئ، خپل سر غوړ کړئ او مخ پرېمينځئ، تر څو د خلکو پام درته نه شي، چې تاسې روژه ياست. خو ستاسې پروردګار، چې د انسانانو له سترګو څخه پټ دی او هر پټ کار ويني، تاسې ته به اجر درکړي.

په دعا کولو کې رياکاري

کله چې دعا کوئ، د رياکارانو په څېر مه اوسئ! د هغوی دا خوښېږي، چې په عبادتخانو او د لارې په سر کې ودرېږي او دعا وکړي، تر څو خلک يې وويني. زه تاسې ته حقيقت وايم، چې دې خلکو ته يوازېنی اجر او ګټه همدغه ده، چې خلک يې صفت او ستاينه کوي. د دې برعکس، کله چې تاسې دعا کوئ، خپلې کوټې ته ولاړ شئ، دروازه په ځان پسې وتړئ او خپل پروردګار ته چې د انسانانو له سترګو څخه پټ دی دعا وکړئ. بيا به ستاسې پروردګار چې هر پټ کار ويني، اجر درکړي.

د دعا په وخت کې د مشرکینو په څېر تکراري خبرې مه يادوئ. دوی فکر کوي، چې ښايي د ډېرو الفاظو په بيا بيا تکرارولو سره به یې خدای ﷻ دعا واوري. تاسې د دوی په شان مه اوسئ، ځکه چې پروردګار مو له غوښتنو څخه مخکې لا په دې خبر دی، چې تاسې ته د کومو شيانو ضرورت دی. نو په دې ډول دعا وکړئ:

«ای زموږ د عرش پروردګاره! د نړۍ خلک دې ستا پاک نوم ته تعظيم وکړي.
ستا سلطنت دې قايم شي او ستا اراده دې په ځمکه کې هغسې تر سره شي،
لکه په عرش کې چې تر سره کېږي.
موږ ته د نن رزق راورسوې.
زموږ ګناهونه هغسې راوبخښې،
لکه څرنګه چې موږ هغه کسان بخښو، چې بد يې راسره کړي دي.
موږ له امتحان څخه لرې وساتې،
او له شيطان لعين څخه مو وژغورې.»

که تاسې د نورو خلکو بدۍ وروبخښئ، نو ستاسې د عرش پروردګار به هم ستاسې بدۍ دروبخښي، خو که نور خلک ونه بخښئ، نو ستاسې پروردګار به هم ستاسې بدۍ درونه بخښي.