د الهي سلطنت د اخلاقو په اړه د عيسی ﵇ څرګندونې
د زنا په اړه
تاسې خو به د شريعت دا حکم اورېدلی وي چې وايي: «زنا مه کوئ.» خو زه درته وايم، چې که څوک يوې ښځې ته د شهوت په نظر هم وګوري، نو په زړه کې يې زنا ورسره کړې ده. که ستا ښۍ سترګه د ګناه سبب شوه، نو ويې باسه او لرې يې وغورځوه. د دې پر ځای، چې ټول وجود دې دوزخ ته واچول شي، ښه دا ده، چې د بدن يو غړی دې کم شي. که ستا ښی لاس د ګناه سبب شو، له وجوده يې پرې کړه او لرې يې وغورځوه. د دې پر ځای، چې ستا ټول وجود دوزخ ته واچول شي، غوره دا ده، چې د بدن يو غړی دې کم شي.
د قسم کولو په اړه
تاسې به دا حکم هم اورېدلی وي، چې ستاسې پلرونو او نيکونو ته ورکړل شوی و: «په درواغو قسم مه کوئ، بلکې که د ﷲ تعالی په نوم مو قسم وکړ، پوره يې کړئ.» خو زه تاسې ته وايم، هېڅکله قسم مه کوئ! مه په آسمان، ځکه چې هغه د ﷲ تعالی عرش دی. مه په ځمکه، ځکه چې هغه د ﷲ تعالی فرش دی، مه په يروشلم، ځکه چې هغه زموږ د لوی پاچا ښار دی او نه هم په خپل سر، ځکه چې تاسې يې يو وېښته هم تورولای يا سپينولای نه شئ. بلکې، که د «هو» ځواب په کار و، نو «هو» وواياست، او که د «نه» و، نو «نه» وواياست. له دې حد څخه تېری کول شيطاني حرکت دی.
د انتقام په اړه
تاسې به د تورات شريف دا حکم هم اورېدلی وي، چې وايي: «د سترګې قصاص په سترګه او د غاښ قصاص په غاښ دی.» خو زه درته وايم، که چا بد درسره وکړل، مقابله يې مه کوه! که چا پر مخ څپېړه درکړه، نو د مخ بله خوا دې ورواړوه. که چا درباندې دعوا وکړه، تر څو کميس درڅخه واخلي، نو خپله چپنه هم ورکړه. او که د روم يوه عسکر درته وويل: زما توکي تر يوه ميله راته انتقال کړه، نو ته تر دوه ميله ورسره ولاړ شه. که چا له تا څخه د کوم شي غوښتنه وکړه، نو ورته وريې کړه او که چا پور درڅخه وغوښت، انکار مه ورته کوه.
له خپلو دښمنانو سره د مينې په اړه
تاسې به دا اورېدلي وي، چې وايي: «له خپل دوست سره مينه او محبت کوئ او له خپل دښمن څخه کرکه او نفرت کوئ.» خو زه درته وايم، چې له خپلو دښمنانو سره مينه او محبت وکړئ او هغه کسان چې تاسې ځوروي، د هغوی لپاره د خير دعا وغواړئ، تر څو تاسې د خپل عرش د پروردګار په نازوليو کې وشمېرل شئ، ځکه چې ﷲ ﷻ لمر پر ښو او بدو دواړو ځلوي او باران پر نېکوکارانو او بدکارانو دواړو وروي. که تاسې يوازې له هغه چا سره مينه کوئ، چې له تاسې سره مينه کوي، نو د اجر څه هيله لرئ، ځکه چې فاسد محصول اخيستونکي هم همداسې کوي. که تاسې يوازې خپلو دوستانو ته د سلامتۍ دعا کوئ، نو دا مو څه خاص کار نه دی کړی، ځکه چې مشرکين هم همداسې کوي. نو په څه ډول چې ستاسې د عرش پروردګار کامل دی، هماغسې تاسې هم کامل واوسئ! د څه ډول چلند چې له نورو څخه هيله لرئ، هماغسې چلند له نورو سره وکړئ. د تورات شريف او د انبياوو د ليکنو خلاصه همدا ده. په دې خاطر، څوک چې له الهي احکامو څخه تر ټولو کوچنی حکم هم له نظره وغورځوي او يا دا کار نورو خلکو ته ورزده کړي، نو هغه به په الهي سلطنت کې تر ټولو کوچنۍ درجه ولري. خو څوک چې الهي احکام پر ځای کړي او نورو خلکو ته يې وروښيي، په الهي سلطنت کې به د لويې درجې خاوند شي. نو ځکه تاسې ته وايم، چې د خدای ﷻ د احکامو پر ځای کولو کې بايد د موسوي شريعت له عالمانو او افريسيانو څخه مخکې شئ. که نه، نو په الهي سلطنت کې به ځای ونه لرئ.