عيسی ﵇ د ګناهونو د بخښلو اختيار لري

يوه ورځ عيسی ﵇ په يوه کور کې الهي درسونه ورکول. په ناستو اورېدونکو کې د افريسي فرقې پيروان او د شريعت استادان هم وو، چې د ګليل او يهوديې له ډېرو کلو او يروشلم ښار څخه راغلي وو. د شفا ورکولو لپاره د خدای تعالی قدرت له عيسی ﵇ سره و. دلته څو کسانو يو شل سړی په ځولۍ کې راووړ او غوښتل يې، چې د شفا لپاره يې د عيسی ﵇ مخې ته وروړي، خو د خلکو د ګڼې ګوڼې له امله يې نه شول کولای چې کوټې ته يې وردننه کړي. نو شل سړی يې بام ته پورته کړ، بام يې سوری کړ او د ځولۍ په وسيله یې هغه کس د عيسی ﵇ مخې ته ورښکته کړ. عيسی ﵇ چې د دې خلکو ايمان وليد، نو شل سړي ته يې وفرمايل: وروره! ستا ګناهونه دربخښل شوي دي.

د افريسي فرقې پيروانو او د موسوي شريعت عالمانو چې دا خبره واورېدله، نو په خپلو کې يې سره وويل: دغه سړی ځان څه بولي؟! کفر وايي! ګناهونه خو يوازې ﷲ ﷻ بخښلای شي!

عيسی ﵇ د دوی له فکرونو څخه خبر و او ورته ويې فرمايل: تاسې ولې په زړونو کې داسې فکرونو ته ځای ورکوئ؟ دا خبره به تاسې ته آسانه ښکاري، چې زه وايم: «ستا ګناهونه دربخښل شوي دي.» تاسې به فکر کوئ، چې دا خبره خو هر څوک کولای شي، خو تصديق يې نشي کولای، چې آيا په رښتيا هم د هغه سړي ګناهونه بخښل شوي دي او کنه. خو دا خبره به ډېره سخته وي، چې يوه شل سړي ته وواياست: «راپاڅه او پر خپلو پښو حرکت وکړه.» تر څو تاسې قانع شئ، چې زه د بني آدمو سردار په ځمکه کې د ګناهونو د بخښلو اختيار لرم، نو دا سخت کار به هم په عملي ډول تر سره کړم.
له دې وروسته عيسی ﵇ خپل مخ شل سړي ته ورواړاوه او ويې فرمايل: راپاڅه! بستره دې ټوله کړه او پر خپلو پښو کور ته ولاړ شه!

په هماغه شېبه شل سړی نېغ ودرېد، خپله بستره يې ټوله کړه او د ﷲ ﷻ د لويۍ او ثنا په ادا کولو سره په خپلو پښو کور ته روان شو. د دې پېښې په ليدو سره ټول خلک هک حيران شول او د ﷲ ﷻ د لويۍ او ثنا په بيانولو يې پيل وکړ. ټول په هيبت کې شول او له يو بل سره يې ويل: نن مو ناممکن کارونه په خپلو سترګو وليدل!