عيسی ﵇ يوه سړي ته چې د پوستکي په ناپاکوونکي مرض اخته و، شفا ورکوي

يوه ورځ عيسی ﵇ يوه ښار ته تشريف يووړ. هلته يو سړی و، چې د پوستکي په ناپاکوونکي مرض اخته و. دې مرض د سړي ټول بدن نيولی و. کله چې یې عيسی ﵇ وليد، نو په پښو کې يې ځان ورواچاوه او زارۍ يې ورته وکړې: مولا! که ستا رضا وي، ته مې له دې ناپاکوونکي مرضه پاکولای شې.

عيسی ﵇ خپل لاس ورباندې راکش کړ او ويې فرمايل: هو، زما رضا ده. له مرضه پاک او روغ شه!

په هماغه لحظه د سړي مريضي لرې شوه. عيسی ﵇ وفرمايل: د دې پېښې حال چا ته مه وايه. لومړی بيت المقدس ته ولاړ شه او خپل ځان امام ته وښيه، چې هغه دې شفا او پاکوالی تصديق کړي. بيا هغه قربانۍ تر سره کړه، چې په موسوي شريعت کې يې حکم راغلی دی. له دې کارونو سره به خلکو ته معلومه شي، چې ته پاک شوی يې او په ټولنه کې بېرته ژوند کولای شې.*

خو له دې سره – سره عيسی ﵇ نور هم مشهور شو او ډلې- ډلې خلک به ورته راتلل، چې الهي پيغام واوري او له ناروغيو څخه شفا پيدا کړي. د دې مصروفيتونو تر څنګ به عيسی ﵇ کله – کله بيابان ته تشريف ووړ او له ﷲ ﷻ سره به يې راز و نياز کاوه.

* د موسوي شريعت له مخې که به څوک د پوستکي په دې مرض ککړ و، نو هغه به ناپاک بلل کېده او د ټولنې په منځ کې به يې د ژوند کولو اجازه نه درلوده. کله چې به یې شفا پيدا کړه، نو د خدای ﷻ کور ته به ته، چې امام يې شفا تاييد کړي. بیا به يې له هغې وروسته د قربانۍ ځينې مراسم تر سره کول، تر څو پاک شي او بیا په ټولنه کې ژوند وکولای شي.