د بزګر په اړه مثال

بيا عيسی ﵇ دوی ته يو بل مثال راووړ او ويې فرمايل: يو بزګر د تخم پاشلو لپاره راووت. کله چې يې دانې پاشلې، ځينې د لارې پر سر توی شوې، چې د لارويانو تر پښو لاندې شوې او بيا مرغانو وخوړلې. ځينې دانې پر ډبرينه ځمکه توی شوې. دغه دانې راشنې شوې، خو څرنګه چې ځمکې کافي نم نه درلود، څه موده وروسته بوټي ژيړ او وچ شول. ځينې دانې د اغزنو بوټو په منځ کې توی شوې. اغزن بوټي له نوو بوټو څخه تاو شول او مړاوي يې کړل، خو ځينې نورې دانې په حاصلخېزه ځمکه کې توی شوې، راشنې شوې او سل برابره يې حاصل وکړ.

عيسی ﵇ چې دا مثال وړاندې کړ، زياته يې کړه: ای خلکو! که د اورېدو غوږونه لرئ، نو واورئ!

نږدې اصحابو ترې وپوښتل چې له دې مثال څخه ستاسې مراد څه دی؟

عيسی ﵇ وفرمايل: تاسې ته دا نعمت درکړل شوی دی، چې د الهي سلطنت په باره کې په هغو خبرو پوه شئ، چې مخکې نه وې څرګندې شوې، خو نورو ته د مثالونو په وسيله تعليمات ورکوم، چې د کلام ﷲ دغه خبره پوره او رښتيا شي چې فرمايي: «دوی په سترګو ګوري، خو څه نه ويني. همدارنګه په غوږونو اوري، خو په هېڅ نه پوهېږي.» د اشعيا نبي په ليکنه کې په دې باره کې وړاندوينه راغلې ده، چې ﷲ ﷻ فرمايي: «تاسې خلک به په غوږونو واورئ، خو په هېڅ به نه پوهېږئ. په سترګو به ووينئ، خو سر به مو هېڅ پرې نه خلاصېږي. د دې خلکو زړونه کلک شوي دي، په څه نه شي پوهېدای. غوږونه يې درانه شوي دي، څه نه شي اورېدای. سترګې يې تړلې دي، څه نه شي ليدای. له دې بې وسه دي، چې ما ته رجوع وکړي، تر څو زه يې روغ او شفاياب کړم.» مګر تاسې نېکمرغه ياست، چې په سترګو وینئ او په غوږونو اورئ. زه تاسې ته حقيقت وايم، چې ډېرو انبياوو او نېکو کسانو هيله درلوده، هغه څه وويني او واوري، چې تاسې ليدلي او اورېدلي دي، خو هغوی ته دا ليدل او اورېدل په نصيب نه شول.

بيا عيسی ﵇ وفرمايل: د دې مثال معنی داسې ده: له تخم څخه مراد الهي پيغام دی. په لار کې له توی شوو دانو څخه مراد هغه خلک دي، چې الهي پيغام واوري، خو بيا شيطان راشي او دغه پيغام د دوی له زړونو څخه وباسي، چې دوی پرې ايمان رانه وړي او نجات پيدا نه کړي. پر ډبرينه ځمکه له توی شوو دانو څخه مراد هغه خلک دي، چې الهي پيغام واوري او په لېوالتيا سره يې قبول کړي، خو څرنګه چې دغه پيغام يې په زړونو کې ريښې نه وي کړي، ايمان يې تر ډېره نه پايي او د امتحان په وخت کې خپل ايمان له لاسه ورکړي. په اغزنو بوټو کې له توی شوو دانو څخه مراد هغه خلک دي، چې الهي پيغام واوري، خو د ژوند فکرونه، شتمنۍ او عيش عشرت يې تر غاړې تاو شي او دا پيغام يې په ژوند کې بې ثمره پاتې شي. خو په حاصلخېزه ځمکه کې له توی شوو دانو څخه مراد هغه خلک دي، چې الهي پيغام په ښه او ريښتيني زړه واوري، عمل پرې وکړي او په ثابت قدمۍ سره ثمره او حاصل ورکړي.