عيسی ﵇ خلکو ته شفا او د الهي سلطنت زېری ورکوي

کله چې لمر په لوېدو شو، ډېرو خلکو خپل مريضان او پېريانو نيولي کسان عيسی ﵇ ته راوستل. عيسی ﵇ ډېرو کسانو ته شفا ورکړه، چې په بېلا بېلو مرضونو اخته وو او له ډېرو کسانو يې پېريان لرې کړل، خو پېريانو ته به يې د خبرو کولو اجازه نه ورکوله، ځکه چې دوی ښه خبر وو، چې عيسی ﵇ څوک دی. *

په سبا چې سپېدې لا نه وې چاودلې، عيسی ﵇ راپاڅېد. خلک يې پرېښودل او بيابان ته ولاړ، تر څو له خدای ﷻ سره راز او نياز وکړي. شمعون له نورو اصحابو سره د عيسی ﵇ په لټه کې ووت. کله چې يې پيدا کړ، نو ورته ويې ويل: ټول خلک ستاسې په لټه کې دي.

عيسی ﵇ وفرمايل: راځئ چې شاوخوا کلو ته ولاړ شو، تر څو زه هلته هم د ﷲ ﷻ پيغام اعلان کړم، ځکه په همدې خاطر دنيا ته راغلی يم.
عيسی ﵇ د ګليل په سيمه کې ځای ځای ګرځېد او په هره عبادتخانه کې به يې الهي درسونه ورکول او خلکو ته به يې د الهي سلطنت د ظهور زېری ورکاوه. کمزورو او ناروغو خلکو ته به يې له هر ډول ناروغۍ او تکليف څخه شفا ورکوله.

* حضرت عیسی ﵇ نه غوښتل چې پيريان د ده ﵇ هويت د المسیح په توګه اعلان کړي. بني اسراييلو دا هیله درلوده، چې راتلونکی المسیح به د روم حکومت مات کړي او د بني اسراييلو له منځه تللی سلطنت به بېرته قایم کړي. حضرت عیسی ﵇ پوهېد چې خدای ﷻ دی ﵇ د دغه هدف لپاره نه دی رالېږلی. په دغه وخت کې ده ﵇ د دې لپاره نه غوښتل چې هویت یې افشا شي، چې بیا به خلکو د سیاست په طرف ورووست.