د غنمو او جودرو د مثال په اړه د عيسی ﵇ تشريحات

تر دې وروسته نږدې اصحاب عیسی ﵇ ته راغلل او ورته ويې ويل: موږ ته د جودرو د مثال معنی راوښياست.

عيسی ﵇ وفرمايل: هغه څوک چې ښه تخم شيندي، له هغه څخه مقصد د بني آدمو سردار دی. له کروندې څخه مراد نړۍ ده او له ښه تخم څخه مطلب د الهي سلطنت اهل دي. له جودرو څخه مقصد د شيطان پيروان دي. هغه دښمن چې د جودرو تخم پاشي، له هغه څخه هدف شيطان لعين دی. د لو له وخت څخه مراد د قيامت ورځ ده او له لوګرو څخه منظور ملايکې دي. په مثال کې څرنګه چې جودر له غنمو څخه جلا کېږي او اور ته اچول کېږي، هماغسې حال به د قيامت په ورځ تر سره کېږي. د بني آدمو سردار به ملايکې له دې اختيار سره راولېږي، چې ګمراه کوونکي او نافرمانه خلک له الهي سلطنت څخه بېل او بې برخې کړي. بيا به يې د دوزخ اور ته ورواچوي. هلته به هغوی ژاړي او غاښونه به چيچي، خو نېک خلک به د خپل پروردګار په سلطنت کې د لمر په شان ځلېږي. ای خلکو! که د اورېدو غوږونه لرئ، نو واورئ!