د الهي سلطنت په اړه د عيسی ﵇ مثالونه

عيسی ﵇ له خپلو اصحابو سره د کَفرناحوم ښار ته تشريف يووړ. د عبادت په ورځ محلي عبادتخانې ته ولاړ او خلکو ته يې الهي درسونه ورکول. ويې فرمايل: ای خلکو! توبه وباسئ، ځکه چې د الهي سلطنت د قايمېدو وخت رانږدې شوی دی.

د الهي سلطنت خپرېدل داسې مثال لري، لکه يو سړی چې په ځمکه کې تخم وپاشي. بيا شپې او ورځې تېروي، ويده کېږي، راوېښېږي. تخم ورو – ورو وده کوي او راشين کېږي، خو سړی په دې نه پوهېږي، چې دا هر څه څنګه کېږي، ځکه چې د ودې کار د ځمکې خپل کار دی. لومړی تخم تېغ وهي، بيا وږي کوي او په پای کې غلې دانې پخېږي. کله چې فصل پوخ شي، لو کوونکي لور په لاس ورلېږل کېږي، چې د فصل رېبلو وخت رارسېدلی دی.

بيا عيسی ﵇ يو بل مثال راووړ او ويې فرمايل: د الهي سلطنت مثال داسې دی، لکه يو بزګر چې په خپله کرونده کې د غنمو ښه تخم وپاشي، خو د شپې چې ټول مزدوران ويده وي، د بزګر دښمن راشي او د غنمو په منځ کې د جودرو تخم وپاشي، بيا په پټه ترې ولاړ شي. غنم چې راشنه شي او وږي وکړي، ورسره جودر هم راشنه شوي وي. مزدوران بزګر ته ورځي او ورته وايي: صاحبه! تاسې خو په دغه ځمکه کې ښه غنم کرلي وو، نو تر منځ يې جودر څنګه راشنه شوي دي؟

بزګر وايي: دا کار کوم دښمن کړی دی!

دوی وايي: آيا دا د جودرو بوټي اوس له بېخه راوباسو؟

بزګر وايي: نه! که داسې وکړئ، له جودرو سره – سره به مو غنم هم له بېخه راايستلي وي. پرېږدئ چې دواړه د لو تر وخته پورې يو ځای وده وکړي. د لو په وخت کې به بيا زه لوګرو ته ووايم، چې لومړی جودر جلا کړي، په کودو کې يې وتړي او بيا يې اور ته واچوي او غنم په ګدام کې خوندي کړي.

دا مثال هم واورئ! الهي سلطنت د يوه غټ جال په څېر دی، چې ماهيګيران يې اوبو ته ورواچوي او هر ډول کبان پکې راګير شي. کله چې جال ډک شي، ماهيګيران يې ځمکې ته راکش کړي. بيا سره کېني. حلال کبان په ټوکريو کې راټول کړي او حرام کبان لرې وغورځوي. همدارنګه حالت به د قيامت په ورځ هم وي. ملايکې به راشي او خرابکاران به له نېکوکارانو څخه جلا کړي او د دوزخ اور ته به يې ورواچوي. هلته به هغوی ژاړي او غاښونه به چيچي.