عيسی ﵇ د ماهيانو معجزه ښکاره کوي

يوه ورځ عيسی ﵇ د ګليل جهيل پر غاړه ولاړ و او ډېر خلک د الهي پيغام اورېدلو لپاره ورته راټول شوي وو. عيسی ﵇ د جهيل په ساحل کې دوې کښتۍ وليدلې، چې ماهيګيران ترې ښکته شوي وو او د جالونو په پاکولو لګيا وو. عيسی ﵇ د شمعون کښتۍ ته وروخوت او ويې فرمايل: کښتۍ له ساحله لږ لرې د اوبو خوا ته بوزه. کله چې کښتۍ له ساحله لږ فاصله واخيسته، نو عيسی ﵇ کېناست چې خلکو ته الهي درس ورکړي.

له درس ورکولو وروسته يې شمعون ته وفرمايل: کښتۍ ژورو اوبو ته بوزه او د ماهيانو د نيولو لپاره جالونه واچوئ!

شمعون وويل: استاده، ما او ملګرو مې ټوله شپه ځانونه ورپسې ستړي کړل او څه مو لاس ته رانه غلل، خو ستا په وينا به زه بيا هم جالونه واچوم.

کله چې دوی جالونه اوبو ته ورواچول، دومره ماهيان پکې راګير شول، چې تارونه يې په شلېدو کړل. نو دوی خپلو شريکانو، د زبيد زامنو، يعقوب او يوحَنا ته، چې په بله کښتۍ کې وو، په لاس اشاره وکړه چې هله! راشئ زموږ مرسته وکړئ! هغوی هم راغلل او له جالونو څخه يې دومره ډېر ماهيان کښتيو ته واچول، چې دواړه کښتۍ د ډوبېدو له خطر سره مخ شوې.

د دې معجزې په ليدو سره شمعون صفوان او ټول ورسره کسان د نيول شوو ماهيانو ډېروالي ته حيران شول. د ده شريکان، يعقوب او يوحَنا هم حيران پاتې وو. په دې وخت کې شمعون د عيسی ﵇ پښو ته ورټيټ شو او ويې ويل: مولا، زه يو ګناهکار سړی يم. نو له ما څخه ولاړ شئ!

عيسی ﵇ وفرمايل: مه وېرېږه! له نن څخه وروسته به په ماهيانو پسې نه ګرځې، بلکې په انسانانو پسې به ګرځې او زما پيروۍ ته به يې رابولې.

کله چې شمعون، يعقوب او يوحَنا کښتۍ د ساحل غاړې ته راوستلې، خپل هر څه يې پرېښودل او په عيسی ﵇ پسې روان شول.